The President of the Republic of Armenia

10/28/2025 | Press release | Distributed by Public on 10/28/2025 04:50

Հանրապետության նախագահն ընդունել է Միջուկային փորձարկումների համապարփակ արգելման պայմանագրի կազմակերպության գործադիր քարտուղարին

Հանրապետության նախագահ Վահագն Խաչատուրյանն ընդունել է Միջուկային փորձարկումների համապարփակ արգելման պայմանագրի կազմակերպության (CTBTO) գործադիր քարտուղար, դոկտոր Ռոբերտ Ֆլոյդին։

Նախագահ Խաչատուրյանը ողջունել է դոկտոր Ֆլոյդի այցը Հայաստան և բարձր գնահատել կազմակերպության կարևոր գործունեությունը՝ միտված միջուկային փորձարկումների համաշխարհային արգելքին և միջազգային անվտանգության ամրապնդմանը։ Նախագահը հիշեցրել է, որ Հայաստանն առաջիններից էր, որ միացավ կազմակերպությունը ստեղծելու նախաձեռնությանը, իսկ 1996 թվականին դարձյալ առաջիններից մեկը ստորագրեց պայմանագիրը։

Վահագն Խաչատուրյանը նշել է, որ մեր երկիրը մշտապես աջակցել է կազմակերպության նպատակներին ու նախաձեռնություններին և վստահություն հայտնել, որ համագործակցությունը շարունակվելու է նույնքան արդյունավետ և կառուցողական ձևաչափով։

Դոկտոր Ռոբերտ Ֆլոյդը շնորհակալություն է հայտնել ջերմ ընդունելության համար՝ ընդգծելով, որ մեծապես գնահատում է Հայաստանի հետևողական աջակցությունը CTBTO-ի գործունեությանը։ Նա նշել է, որ ուրախ է կրկին այցելել Հայաստան և քննարկել համագործակցության ընդլայնման նոր հնարավորությունները։

Հանդիպման ընթացքում կողմերը քննարկել են միջուկային անվտանգության ապահովմանն ու համաշխարհային կայունության պահպանմանը վերաբերող մի շարք հարցեր։

Անդրադարձ է կատարվել նաև միջուկային փորձարկումների արգելման համընդհանուր նշանակության, դրանց վերահսկման և կանխարգելման մեխանիզմների կատարելագործման: Կողմերը կարևորել են նման նախաձեռնությունների դերակատարությունը՝ ուղղված համաշխարհային խաղաղությանը, կայուն զարգացմանը և տարածաշրջանային անվտանգությանը։

← Վերադառնալ

The President of the Republic of Armenia published this content on October 28, 2025, and is solely responsible for the information contained herein. Distributed via Public Technologies (PUBT), unedited and unaltered, on October 28, 2025 at 10:50 UTC. If you believe the information included in the content is inaccurate or outdated and requires editing or removal, please contact us at [email protected]