17-vjetori i anëtarësimit të Shqipërisë në NATO- Ministri Hoxha: Shqipëria, Aleate e përkushtuar dhe e besueshme

Në përvjetorin e 17-të të anëtarësimit të Shqipërisë në NATO, Ministri për Evropën dhe Punët e Jashtme, Ferit Hoxha, përmes një postimi në platformën X, theksoi rëndësinë historike të këtij momenti për vendin tonë dhe rolin e Shqipërisë në Aleancë.

"Si sot, 17 vjet më parë, Shqipëria hodhi një hap vendimtar drejt së ardhmes së saj duke u bërë anëtare me të drejta të plota në NATO - një moment historik që e ankoroi vendosmërisht rrugëtimin tonë euro-atlantik dhe konsolidoi themelet e sigurisë kombëtare," u shpreh Ministri Hoxha.

Duke vlerësuar kontributin e Shqipërisë ndër vite, ai nënvizoi se vendi ynë ka dëshmuar se është një Aleat i përkushtuar dhe i besueshëm, përmes pjesëmarrjes aktive në misionet dhe operacionet e NATO-s, si dhe përmes rolit të tij në promovimin e stabilitetit në Ballkanin Perëndimor, përfshirë mbështetjen e vazhdueshme për perspektivën euro-atlantike të Kosovës.

Ministri theksoi gjithashtu se Shqipëria është sot plotësisht e harmonizuar me prioritetet në zhvillim të NATO-s, duke kontribuar në ndarjen e drejtë të përgjegjësive, rritjen e investimeve në mbrojtje, forcimin e qëndrueshmërisë, si dhe në adoptimin e inovacionit dhe teknologjive të reja në një mjedis sigurie gjithnjë e më dinamik.

Në vijim, ai nënvizoi rëndësinë e përgatitjeve të Shqipërisë për të pritur një Samit të NATO-s për herë të parë në rajon, duke e cilësuar këtë si një dëshmi të qartë të besimit të Aleancës në rolin dhe kontributin e vendit tonë.

"Në një botë gjithnjë e më komplekse dhe të pasigurt, Shqipëria mbetet e palëkundur - e bashkuar me Aleatët, e përkushtuar ndaj mbrojtjes kolektive dhe e dedikuar për ruajtjen e paqes, lirisë dhe vlerave tona të përbashkëta," përfundoi Ministri Hoxha.

#NeJemiNATO
#MëTëFortëSëBashku