STQARRIJA MILL-UFFIĊĊJU TAL-PRESIDENT Tliet Ambaxxaturi mhux residenti ġodda jippreżentaw il-kredenzjali tagħhom lill-President ta’ Malta.

Dalgħodu, tliet Ambaxxaturi ppreżentaw il-kredenzjali tagħhom lill-Eċċellenza Tagħha Myriam Spiteri Debono, President ta' Malta, fil-Palazz Presidenzjali fil-Belt Valletta.

Dawn huma:

L-Ambaxxatur tal-Istat tal-Iżrael, Ruth Cohen-Dar,

L-Ambaxxatur tar-Repubblika tal-Korea, Choon-goo Kim, u

L-Ambaxxatur tar-Repubblika tal-Liberja, Genevieve Kennedy.

​Wara li ppreżentat il-Kredenzjali lill-Eċċellenza Tagħha, l-Ambaxxatur tal-Istat tal-Iżrael tkellmet dwar it-tama li għandu l-Istat Iżraeljan wara l-qbil ta' waqfien mill-ġlied aktar kmieni dan ix-xahar. Fuq livell bilaterali, hija kkommettiet ruħha li ser tkun qed taħdem bis-sħiħ biex issaħħaħ ir-relazzjonijiet bejn il-popli speċjalment fl-oqsma tan-negozju, kummerċ kif ukoll fit-turiżmu.

Fil-laqgħa li kellu mal-Eċċellenza Tagħha, l-Ambaxxatur tar-Repubblika tal-Korea tkellem dwar ir-relazzjonijet tajbin ma' Malta, u kif din is-sena qed jiġu ċċelebrati sittin sena ta' relazzjonijiet. Ġew diskussi wkoll l-irwoli importanti ta' Malta u r-Repubblika tal-Korea f'fora multilaterali, fosthom fil-Kunsill ta' Sigurtà tan-Nazzjonijiet Uniti, fejn kemm Malta kif ukoll il-Korea kienu eletti u servew fl-istess Kunsill.

Min-naħa tagħha, l-Ambaxxatur tar-Repubblika tal-Liberja, irrimarkat l-impenn ta' pajjiżha biex tkompli ssaħħaħ ir-relazzjonijiet bilaterali. Hija tkellmet ukoll dwar il-prospetti ta' kollaborazzjoni bejn Malta u l-Liberja, speċjalment fejn jidħlu s-setturi tal-marittimu, tal-agrikoltura u anke tal-promozzjoni tal-ugwaljanza.

Matul il-laqgħat, il-President Spiteri Debono ferħet lill-Ambaxxaturi għall-ħatra tagħhom.