Festigual inaugura a exposición dos seus dez anos de historia e encara unha fin de semana co humor como protagonista

O Festigual continúa celebrando o seu décimo aniversario coa inauguración da exposición conmemorativa '10 anos de Festigual', que abriu esta tarde as súas portas no Fórum Metropolitano. A mostra, que poderá visitarse ata o 20 de novembro, propón un percorrido polas dez edicións do festival e reúne tanto as novas creacións desenvolvidas no marco de 'Arte con Impacto' como materiais, imaxes e testemuñas que reflicten a evolución dun proxecto cultural consolidado como referencia en accesibilidade e inclusión.

O acto contou coa participación de Nereida Canosa, concelleira de Benestar Social, Participación e Igualdade e vicepresidenta da Fundación Emalcsa; de María Arantzazu Escalada Sarabia, directora de Sostibilidade, Relacións Institucionais e Reale Foundation España; así como de representantes das entidades sociais, artistas participantes e responsables da Fundación Emalcsa.

Durante a inauguración, Canosa puxo en valor a cultura como un dereito fundamental: "Inclúe acceder ás propostas culturais e poder participar na súa creación, cos apoios que cada persoa precise". A concelleira defendeu tamén a responsabilidade das institucións públicas para crear as condicións que permitan exercer ese dereito e destacou a importancia de incorporar a accesibilidade desde o propio deseño das actividades culturais.

A exposición ten a súa orixe na convocatoria de Cultura Accesible e Inclusiva da Fundación Emalcsa, da que naceu Festigual como espazo de encontro entre o talento artístico da cidade e a experiencia das entidades sociais. A través das diferentes pezas e materiais expostos, o público pode achegarse non só aos resultados finais, senón tamén aos procesos de creación compartida que caracterizan o festival.

Un dos espazos centrais da mostra está dedicado a 'Arte con Impacto', unha iniciativa desenvolvida co apoio de Reale Foundation que reuniu durante os últimos meses a cinco artistas e cinco entidades sociais da Coruña. As obras presentadas son froito do traballo colaborativo entre Yolanda Dorda e Bolboretas, Lara Pintos e ADCOR, Manuel Suárez e GRUMICO, Jano Muñoz e Ecos do Sur, e Héctor Francesch e APEM. As persoas participantes das diferentes entidades traballaron directamente cos artistas na elaboración das pezas agora expostas.

A mostra inclúe ademais unha escultura co número dez cuberta con 10.000 selos achegados por participantes da convocatoria de Cultura Accesible e Inclusiva, recupera a exposición fotográfica 'Unha mirada á diversidade', do fotoxornalista Óscar Corral, presentada en Festigual 2020, e reúne carteis e imaxes das distintas edicións do festival. O percorrido ofrece tamén unha visión global da dimensión alcanzada por Festigual desde 2017, cun balance de máis de 160 actividades e espectáculos, arredor dun milleiro de artistas, 126 entidades e profesionais implicados e máis de 14.000 persoas participantes. Ademais, este sábado incorporarase á exposición unha intervención da Asociación AÏS co proxecto 'Aquamatrix'.

Canosa subliñou tamén a importancia de trasladar a experiencia de Festigual ao conxunto da actividade municipal e puxo como exemplo o Festival Noroeste Estrella Galicia, que este ano obtivo o selo de calidade Music for All tras incorporar diversas medidas de accesibilidade coa participación da Fundación Emalcsa, entre elas a interpretación en lingua de signos en concertos, o préstamo de mochilas vibratorias e a instalación de bucles magnéticos.

Tras a inauguración da exposición, Festigual continuará a súa programación esta fin de semana coa actuación dos humoristas Marc Buxaderas e Oswaldo Digón, que presentarán este venres no Teatro Colón o espectáculo 'Spasticity and More'. O sábado será a quenda da proposta de cultura urbana Poten100mos no Mercado de Montealto e da colaboración entre a Orquestra Sinfónica de Galicia e Clownssics no Palacio da Ópera. A programación da fin de semana rematará o domingo no Teatro Rosalía de Castro coa representación de 'ON TIME', da compañía Fritsch Company.

Festigual está organizado polo Concello da Coruña e a Fundación Emalcsa, coa colaboración da Fundación María José Jove, Vegalsa-Eroski, Reale Foundation e a Deputación da Coruña, e coa xestión de Culturactiva. A programación desta edición prolongarase ata o 19 de novembro e pode consultarse en www.festigual.gal.