STQARRIJA MIS SEGRETARJAT PARLAMENTARI GĦAD DJALOGU SOĊJALI Ċertifikat b’saħħtu għal pajjiżna mir rapport tal Bord Nazzjonali tal Produttività 2024

F'Business Breakfast organizzat mill-Bord Nazzjonali tal-Produttività mmexxi miċ-Chairperson tal-Bord u tal-MCESD, il-Perit David Xuereb, u bis-sehem tas-Segretarju Parlamentari għad-Djalogu Soċjali Andy Ellul ġie uffiċjalment ippublikat ir-Rapport Nazzjonali tal-Produttività 2024.

Dan ir-rapport, filwaqt li jagħti ċertifikat b'saħħtu lill-ħidma tal-Gvern billi juri li pajjiżna jinsab fid-direzzjoni t-tajba f'diversi setturi, jiffoka fuq it-transizzjoni doppja lejn id-diġitalizzazzjoni u prattiki kummerċjali sostenibbli, bil-għan li jissaħħu l-produttività u l-kompetittività f'Malta.

Ir-rapport jippreżenta rakkomandazzjonijiet fosthom li l-Gvern jibqa' jinvesti f'infrastruttura moderna, fit-tisħiħ tal-ħiliet tal-ħaddiema u li jkompli bis-sostenn lin-negozji żgħar u medji, miżuri li kollha jirriflettu l-politika tal-Unjoni Ewropea u l-prijoritajiet tagħha.

Ir-rapport jitfa' wkoll dawl fuq kif il-produttività m'għandhiex tibqa' titqies biss bħala produzzjoni ekonomika, iżda bħala mezz biex titjieb il-kwalità tal-ħajja, tixpruna l-innovazzjoni u tiżgura futur aktar reżiljenti u inklussiv għal pajjiżna.

Is-Segretarju Parlamentari Andy Ellul fisser dan ir-rapport bħala ċertifikat ieħor b'saħħtu għal ħidmet il-Gvern. Qal li huwa turija ċara ta' kemm il-Gvern qed jadotta politika fejn ħadd ma jitħalla jaqa' lura. "B'hekk il-Gvern ikun jista' jkompli jkun ta' sostenn kemm għal min iħaddem, in-negozji jibqgħu jinvestu fl-operat tagħhom u aħna nkunu f'pożizzjoni aħjar biex nibqgħu noffru l-aħjar kundizzjonijiet għall-ħaddiema filwaqt li noffru l-aħjar impjiegi," saħaq is-Segretarju Parlamentari.

"Dan ir-rapport jimxi id f'id mal-Malta Vision 2050 illi l-konsultazzjoni pubblika tagħha tnediet aktar kmieni din il-ġimgħa u li tiffoka fuq pilastri ekonomiċi li ser iwasslu lil pajjiżna għall-kwalità ta' ħajja aħjar kemm għall-familji kif ukoll għall-ħaddiema," temm jgħid Dr Ellul.

Iċ-Chairperson tal-Bord, il-Perit David Xuereb, saħaq li "Dan ir-rapport li għadu kemm ġie ppubblikat, li jiffoka fuq il-bżonn tat-tranżizzjoni diġitali u ħadra, jiġbor fih l-ambizzjonijiet tal-futur, ambizzjonijiet li jiffurmaw parti mill-Malta Vision 2050."

Waqt din il-konferenza, ġie osservat mument ta' silenzju b'rispett lejn l-Eks Chairperson tal-MCESD, Saviour Portelli, li miet riċentement, bħala rikonoxximent tal-kontribut tiegħu għad-djalogu soċjali u għall-iżvilupp tal-MCESD matul is-snin ta' servizz tiegħu.

Għal din il-konferenza attendew numru ta' mistiedna distinti, fosthom Membri Parlamentari miż-żewġ naħat tal-kamra, imsieħba soċjali fi ħdan l-MCESD, diversi Segretarji Permanenti, akkademiċi, kif ukoll kapijiet eżekuttivi ta' kumpaniji ewlenin, aġenziji pubbliċi u kumpaniji mis-settur privat. Ipparteċipa wkoll Dr Filippo Di Mauro, il-fundatur ta' CompNet, kumpanija li tiffoka fuq network ta' riċerka dwar il-produttività u l-kompetittività, li saħaq fuq l-importanza ta' qafas analitiku bbażat fuq id-data. Fost il-kelliema li taw kontribut attiv għad-diskussjoni, kienu Kenneth Farrugia, il-Kap Eżekuttiv tal-BOV, il-Prof. Simone Borg, l-Ambaxxatur ta' Malta għall-Azzjoni fuq il-Klima, Roberta Dalli Albanese, il-Kap tas-Segretarjat fi ħdan il-Ministeru għall-Ekonomija, Investiment u Intrapriżi Żgħar u, Donna Cardona, intraprenditriċi u fundatur ta' My Mama.

​​