Utanríkisráðherrar ræddu og áréttuðu mikilvægi vestnorræns samstarfs

Sameiginleg tækifæri og áskoranir í vestnorrænni samvinnu voru til umræðu á þríhliða fundi utanríkisráðherra Íslands, Færeyja og Grænlands, sem fram fór í Reykjavík síðastliðinn föstudag.

"Vestnorræn samvinna á sem flestum sviðum er Íslendingum afar mikilvæg. Við eigum sameiginlegan menningararf sem mikilvægt er að hlúa að og halda á lofti og á óvissutímum á alþjóðasviðinu er mikilvægara en nokkru sinni fyrr að styrkja tengslin við okkar næstu nágranna og vini," segir Þórdís Kolbrún Reykfjörð Gylfadóttir utanríkisráðherra.

Utanríkisráðherrar Íslands, Færeyja og Grænlands hittast á þríhliða fundi einu sinni á ári og styrkja þannig sambandið milli landanna þriggja. Á fundinum voru rædd málefni efst á baugi í vestnorrænu samstarfi um þessar mundir. Þá átti ráðherra sömuleiðis tvíhliða fund með Högna Hoydal, utanríkisráðherra Færeyja, þar sem viðskiptamál og framkvæmd fríverslunarsamnings Íslands og Færeyja voru efst á baugi.

Þórdís Kolbrún var einnig viðstödd undirritun samninga Icelandair við Atlantic Airways og Air Greenland sem fór fram á jaðri Hringborðs norðurslóða. Með samningunum geta flugfélögin boðið öflugar tengingar milli Grænlands og Færeyja annars vegar og Norður-Ameríku og Evrópu hins vegar, í einum flugmiðla í gegnum Ísland.