STQARRIJA MILL-UFFIĊĊJU TAD-DEPUTAT PRIM MINISTRU U L-MINISTERU GĦALL-AFFARIJIET BARRANIN U T-TURIŻMU U MILL-MINISTERU GĦALL-INTERN, IS-SIGURTÀ U X-XOGĦOL

Miżuri ġodda ta' infurzar biex jappoġġjaw il-komunitajiet residenzjali f'żoni turistiċi

Vetturi elettriċi ġodda għall-Pulizija tal-komunità, sistemi ta' sorveljanza u sistemi għal kontra l-istorbju

Il-Gvern qed iniedi sistemi ta' kameras ta' sorveljanza aktar avvanzati fis-Swieqi, noise monitors għal kontra l-istorbju fil-Belt Valletta, aktar riżorsi għall-Pulizija tal-komunità, multi li jingħataw lil persuni barranin li m'għandhomx residenza f'Malta li jitħallsu dak il-ħin, kif ukoll regolamenti aktar stretti dwar l-akkomodazzjonijiet turistiċi, sabiex jissaħħaħ l-infurzar u jingħata aktar appoġġ lill-komunitajiet residenzjali f'żoni turistiċi.

Id-Deputat Prim Ministru u Ministru għall-Affarijiet Barranin u t-Turiżmu, Ian Borg, flimkien mal-Ministru għall-Intern, is-Sigurtà u x-Xogħol, Byron Camilleri, ħabbru dawn il-miżuri waqt żjara fis-Swieqi nhar it-Tlieta. Dawn l-inizjattivi jagħmlu parti minn proġett pilota ta' appoġġ lill-komunitajiet fit-turiżmu, imniedi fl-2025 mill-Ministeru għat-Turiżmu, bil-għan li l-iżvilupp turistiku jimxi id f'id mal-benesseri tar-residenti, filwaqt li jindirizza t-tħassib tal-kunsilli lokali dwar l-ordni pubbliku, ir-regolamenti dwar il-kirjiet turistiċi għal żmien qasir, u aspetti oħra relatati.

Wara diskussjonijiet mal-kunsilli lokali u ma' dawk kollha involuti fl-industrija turistika bħala parti minn dan il-proġett pilota u inizjattivi oħra, diversi miżuri se jidħlu fis-seħħ qabel is-sajf 2026:

Sistema ta' sorveljanza fi Swieqi mmonitorjata mil-LESA: L-Awtorità Maltija għat-Turiżmu (MTA) iffinanzjat l-installazzjoni mill-ġdid u l-immodernizzzar tan-network ta' kameras ta' sorveljanza fis-Swieqi, b'kollaborazzjoni mal-Kunsill Lokali, b'kameras ġodda f'postijiet strateġiċi madwar il-lokalità. Dan in-network ta' 30 kamera, li wħud minnhom issa huma mgħammra b'teknoloġija pan-tilt-zoom (PTZ), se jkunu mmonitorjati 24 siegħa kuljum minn uffiċjali tal-LESA fiċ-Ċentru ta' Kontroll tagħha, bħala parti minn sistema usa' ta' monitoraġġ li testendi sa Paceville u San Ġiljan. Din il-kollaborazzjoni se ttejjeb l-effiċjenza tal-infurzar f'din iż-żona, għall-benefiċċju kemm tar-residenti kif ukoll tal-viżitaturi.

Sistemi ta' monitoraġġ tal-ħoss fil-Valletta b'allerti awtomatiċi: B'kollaborazzjoni mal-Kunsill Lokali tal-Belt Valletta, l-MTA qed tiffinanzja l-installazzjoni ta' sistema ta' monitoraġġ tal-livelli tal-ħoss f'erba' mit-toroq l-aktar popolari fil-Belt, sabiex tgħin lill-Pulizija fl-azzjoni tagħhom kontra livelli eċċessivi ta' storbju, speċjalment billejl. Is-sistemi se jidentifikaw meta jkun hemm storbju eċċessiv u awtomatikament jibagħtu avviż immedjat lill-Pulizija. L-ewwel tagħmir ta' dan it-tip se jitwaħħal fil-ġimgħat li ġejjin fi Triq ir-Repubblika, Triq Merkanti, Strada Stretta u Triq San Pawl, bil-ħsieb li s-sistema eventwalment tiġi estiża għal toroq oħra wkoll. Biex tkun żgurata l-privatezza, dawn is-sistemi mhux se jirrekordjaw vuċijiet jew ħsejjes oħra, iżda se jkejlu biss il-livelli tal-ħoss.

Flotta ġdida għall-Pulizija tal-Komunità: Il-Ministeru għall-Affarijiet Barranin u t-Turiżmu qed jipprovdi vetturi elettriċi ġodda għat-tisħiħ tal-ħidma tal-Pulizija tal-Komunità, speċjalment f'lokalitajiet b'ħafna attività turistika. Dawn il-vetturi ġew iffinanzjati mill-kontribuzzjonijiet ambjentali mħallsa mit-turisti li jżuru l-gżejjer Maltin, li huma amministrati b'mod konġunt mill-Ministeru għat-Turiżmu, l-MTA u l-Assoċjazzjoni Maltija tal-Lukandi u r-Ristoranti (MHRA).

Multi fuq il-post għat-turisti: Mill-1 ta' Ġunju, uffiċjali tal-Pulizija, tal-LESA u tal-Awtorità għall-Ambjent u r-Riżorsi (ERA) se jkunu jistgħu joħorġu multi fuq il-post lil persuni barranin li ma joqogħdux f'Malta, inklużi t-turisti, jekk jiksru l-liġi waqt li jkunu fil-pajjiż. Dawn il-multi se jippermettu ħlas elettroniku immedjat mill-persuni konċernati. Dawn il-miżuri, introdotti permezz ta' regolamenti ġodda, għandhom l-għan li jindirizzaw il-problema ta' persuni li jonqsu milli jħallsu l-multi tagħhom. Dan mhux biss se jsaħħaħ id-deterrent u jtejjeb l-infurzar, iżda se jintroduċi wkoll konsegwenzi għal dawk li jonqsu milli jħallsu dak dovut minnhom.

Regolamenti ġodda għall-akkomodazzjoni għal żmien qasir: Ir-Regolamenti ġodda dwar l-Akkomodazzjoni Turistika mħabbra x-xahar li għadda se jidħlu fis-seħħ dan is-sajf, b'kundizzjonijiet aktar stretti għall-propjetajiet li jinkrew għal żmien qasir. Is-sidien ta' dawn il-proprjetajiet se jkunu obbligati jkollhom tabella barra l-entratura tal-proprjetà, li tinkludi n-numru tal-liċenzja u n-numru ta' kuntatt ta' persuna li tkun disponibbli 24 siegħa kuljum, 7 ijiem fil-ġimgħa, biex tirċievi lmenti u tindirizza kwistjonijiet relatati. Propjetajiet li jiffurmaw parti minn kondominju se jkunu obbligati jipprovdu din l-informazzjoni wkoll lill-amministraturi tal-blokka residenzjali. Barra minn hekk, dawn l-akkomodazzjonijiet iridu jimplimentaw pjan adegwat għall-ġestjoni tal-ġbir tal-iskart. Sidien li jinqabdu joperaw mingħajr liċenzja valida tal-MTA jkunu suġġetti għal skwalifika ta' tliet snin, minbarra pieni oħra.

Minbarra dawn l-inizjattivi, bħala parti mill-proġett pilota ta' appoġġ lill-komunitajiet fit-turiżmu, il-Ministeru għat-Turiżmu qed jaħdem ma' ministeri oħra biex ikompli jassisti lill-kunsilli lokali ta' Swieqi u tal-Belt Valletta. Fuq il-bażi tar-riżultati ta' din il-kollaborazzjoni, il-proġett jista' mbagħad jiġi estiż għal lokalitajiet oħra.

Id-Deputat Prim Ministru Ian Borg irringrazzja lill-MTA, lill-Pulizija, lil-LESA, lill-kunsilli lokali u lil entitajiet oħra għall-ħidma konġunta tagħhom lejn attivitajiet turistiċi b'inqas impatt u b'aktar serħan il-moħħ għall-komunitajiet madwarhom.

"Filwaqt li nkomplu niggwidaw lil dawk kollha konċernati fl-industrija turistiku lejn attivitajiet aktar sostenibbli u ta' valur ogħla, irridu niżguraw ukoll li l-komunitajiet tagħna jgawdu mill-benefiċċji ta' din l-industrija importanti, filwaqt li jikkontribwixxu għal kwalità ta' ħajja aħjar fil-lokalitajiet tagħhom. Il-miżuri mħabbra llum huma pass ieħor f'din id-direzzjoni. Iż-żieda fil-kontribuzzjoni ambjentali fil-Budget 2026, li se tidħol fis-seħħ minn Lulju, se tkompli tiftaħ opportunitajiet għal aktar investiment turistiku fil-komunitajiet tagħna, filwaqt li ninvestu f'esperjenzi aktar awtentiċi u ta' valur akbar għall-viżitaturi tagħna," qal Dr Borg.

Il-Ministru Byron Camilleri qal li "illum, il-Korp tal-Pulizija ta' Malta, il-LESA u l-bqija tal-korpi dixxiplinati jinsabu f'pożizzjoni li jkunu proattivi, mhux biss biex jindirizzaw il-kriminalità, iżda wkoll fil-prevenzjoni. Dawn il-proġetti, emendi legali u inizjattivi kollha għandhom l-għan li jkomplu jiżguraw Malta aktar sigura, pajjiż li llum mhux biss għandu l-inqas rata ta' kriminalità, iżda huwa wkoll l-aktar sigur fil-Mediterran u wieħed mill-aktar siguri fid-dinja. L-għan tagħna huwa li nkomplu nwettqu din il-politika b'mod effettiv, filwaqt li nipprovdu lill-uffiċjali tagħna bl-aqwa għodod, tagħmir u riżorsi biex ikunu jistgħu jkomplu jaqdu dmirijiethom bl-aħjar mod."