Lögreglan varar við fölsuðum skilríkjum ungmenna

Þessi VPN-stilling lætur notandann virðast á öðrum aldri en hann er með því að treysta öryggisskírteini frá rekstraraðila þjónustunnar og beina netumferð símans í gegnum netþjóna hennar. Þjónustan breytir svo kennitölu ungmennisins sem birtist í netbanka og á island.is.

VPN-stillinguna var hægt að kaupa á netinu á bilinu 8. júlí til og með 8. október. Hún er ekki lengur fáanleg.

Ungmennin hafa þurft að slá inn raunverulega kennitölu sína og greiða fyrir þjónustuna á netinu í gegnum greiðslumiðlunina Stripe. Rekstraraðili þjónustunnar hefur því undir höndum raunverulega kennitölu þeirra, fullt nafn, netfang og í nokkrum tilfellum ljósmynd og aldur. Enn fremur er ljóst að þar sem sími ungmennanna treystir nú hinu falsaða skilríki gagnvart öllum vefsíðum getur rekstraraðilinn einnig skoðað umferð tengda tölvupósti, samfélagsmiðlum og öðrum skilaboðum án þess að þau verði þess vör.

Landsbankinn hvetur foreldra og forráðamenn ungmenna til að kanna málið sérstaklega. Ef VPN-stillingin finnst í síma ungmennis er brýnt að bregðast við með eftirfarandi hætti:

1. Athugið hvort VPN-stillingin (e. VPN profile) sé uppsett
   Settings → General → VPN & Device Management.
   Leitið að stillingu sem heitir "Island Surge VPN".
2. Athugið hvort stillingin sé virk
   Settings → General → About → Certificate Trust Settings. Ef þar birtist skilríki sem heitir "Surge" og kveikt er á því, er VPN-stillingin virk.
3. Fjarlægið stillinguna
   Í VPN & Device Management þarf að velja stillinguna og síðan Remove Profile. Þá hverfur skírteinið og VPN-tengingin líka.
4. Fylgist með og hafið samband
   Ef VPN-stilling fannst á símtækinu og eitthvað óeðlilegt kemur upp í tengslum við færslur á reikningum eða greiðslukortum skal strax hafa samband við bankann í síma 410-4000. Athugið að aðgerðir í netbanka og greiðslur á greiðslukortum eru háðar auðkenningu með rafrænum skilríkjum eða persónubundnum auðkenningum. Mikilvægt er að samþykkja ekki auðkenningu sem tengist ekki eigin framkvæmd.

Við hvetjum ykkur til að hafa samband við lögreglu í síma 444-1000 ef þið hafið frekari upplýsingar um málið.