Ministri Hoxha takim me Kryetarin e Komunës së Bujanocit: Mbrojtja dhe promovimi i të drejtave të shqiptarëve në Luginën e Preshevës, përparësi e institucioneve tona

Ministri për Evropën dhe Punët e Jashtme, Ferit Hoxha priti ditën e sotme në Tiranë Kryetarin e Komunës së Bujanocit, Arbër Pajaziti.

Takimi u fokusua në mundësitë për forcimin e bashkëpunimit me institucionet vendore të shqiptarëve në Luginën e Preshevës, jo vetëm në planin politik, por edhe përmes nismave dhe projekteve konkrete në fushën e ekonomisë, arsimit, kulturës, rinisë dhe zhvillimit lokal.

Në një postim në rrjetin social X, Hoxha deklaroi se gjatë takimit "ritheksova vëmendjen e vazhdueshme të Qeverisë së Shqipërisë ndaj çështjeve dhe shqetësimeve të shqiptarëve në Luginë".

"Mbrojtja dhe promovimi i të drejtave dhe lirive themelore të shqiptarëve atje, respektimi i parimit të barazisë dhe mosdiskriminimit, si dhe ruajtja dhe avancimi i identitetit të tyre kombëtar, gjuhësor e kulturor, mbeten përparësi të qëndrueshme të Ministrisë për Evropën dhe Punët e Jashtme dhe të institucioneve shqiptare. Shqipëria do të vijojë të kërkojë zbatimin e standardeve më të larta evropiane dhe ndërkombëtare për mbrojtjen e të drejtave të pakicave, si dhe respektimin e plotë të të drejtave të shqiptarëve në Serbi", shkroi Ministri i Jashtëm.

Ministri shprehu gatishmërinë për të vijuar një komunikim të rregullt dhe të ngushtë me të gjithë përfaqësuesit institucionalë dhe politikë të shqiptarëve të Luginës.

"Po ashtu, nënvizova rëndësinë e bashkëpunimit dhe koordinimit mes aktorëve dhe subjekteve politike shqiptare në Luginë, si një element kyç për avancimin e interesave, maksimalizimin e impaktit përfaqësimit politik në funksion të realizimit të të drejtave të tyre legjitime", përfundon Hoxha.