A Coruña acollerá a primeira edición de Periscopio, un encontro para reflexionar sobre o papel da intelixencia artificial na cultura

O concelleiro de Cultura e Turismo, Gonzalo Castro, na presentación de Periscopio.

O concelleiro de Cultura e Turismo, Gonzalo Castro, participou hoxe na presentación da primeira edición de Periscopio A Coruña, un encontro profesional que se celebrará o vindeiro 2 de outubro na Domus para analizar o impacto da intelixencia artificial nos sectores culturais e creativos. A iniciativa está organizada por Fundación Contemporánea e conta co apoio do Concello da Coruña, a través do Consorcio de Turismo e Congresos, e da Axencia Española de Supervisión da Intelixencia Artificial (AESIA).

A xornada reunirá pensadoras, artistas, investigadoras, profesionais da xestión cultural e especialistas en tecnoloxía para abordar un dos grandes desafíos do presente: o papel que debe desempeñar a cultura nun contexto marcado pola expansión da intelixencia artificial. Durante a presentación, Gonzalo Castro destacou a oportunidade que supón para a cidade acoller esta iniciativa. "A Coruña consolídase como un espazo de referencia para o diálogo entre cultura, innovación e coñecemento. Periscopio permitirá reunir voces de primeiro nivel para reflexionar sobre como queremos que a tecnoloxía se incorpore aos procesos creativos e culturais do futuro", sinalou.

Castro subliñou ademais o compromiso do Goberno de Inés Rey coa innovación cultural. "A Coruña ten demostrado nos últimos anos a súa capacidade para liderar debates de actualidade e atraer encontros profesionais de relevancia estatal. A celebración deste foro reforza a nosa posición como cidade aberta á innovación, pero tamén preocupada polas súas implicacións éticas, sociais e culturais", afirmou.

A programación contará coa participación de figuras destacadas como a escritora e investigadora Remedios Zafra, o director da AESIA, Alberto Gago; o cineasta e artista Chino Moya; o artista e deseñador Alberto Barreiro; o director creativo da Colección SOLO, Óscar Hormigos; e o catedrático da Universidade de Vigo Martín López Nores, entre outros participantes.

O encontro incluirá conferencias, mesas de debate, espazos de traballo colaborativo e sesións de networking. Entre os asuntos que se abordarán figuran as relacións entre cultura e algoritmos, os retos da regulación da intelixencia artificial, os límites éticos da creación automatizada e as oportunidades que ofrecen as novas ferramentas tecnolóxicas para artistas e organizacións culturais.

A xornada completarase cun taller participativo titulado 'Que cultura queremos na era da IA?', coordinado por Silvia Rivela, así como cun espazo de encontros profesionais baixo o formato 'Un café con...', que facilitará o intercambio directo entre especialistas e axentes culturais.

Convocatoria aberta para o hackatón cultural e tecnolóxico

Periscopio A Coruña servirá tamén como punto de partida para o hackatón 'Creadores culturais & tecnólogos', unha iniciativa que reunirá profesionais da cultura e da tecnoloxía para desenvolver prototipos e ferramentas baseadas en intelixencia artificial aplicadas á creación, xestión e difusión de proxectos culturais.

A convocatoria permanecerá aberta ata o 28 de setembro e o programa desenvolverase entre o 2 de outubro e o 16 de decembro. O obxectivo é promover a colaboración interdisciplinar e explorar aplicacións prácticas da IA que poidan incorporarse ao sector cultural.