Rèisimeid Rìoghail na h-Alba a' faighinn Saorsa Inbhir Chluaidh

Rèisimeid Rìoghail na h-Alba a' faighinn Saorsa Inbhir Chluaidh

Chaidh fàilte chridheil a chur air Rèisimeid Rìoghail na h-Alba Disathairne 5 Sultain, agus iad a' faighinn Saorsa Inbhir Chluaidh aig tachartas poblach.

Thàinig na ceudan de dhaoine gus coimhead air a' chaismeachd eadar an Esplanade agus Pàirc a' Bhataraidh far an deach a' chuirm oifigeil a chumail.

Còmhla riutha bha Còmhlan na Rèisimeid agus ceòl nam pìoban is nan drumaichean aig Còmhlan Pìobaireachd, Drumaireachd is Dùdach na Dàrna Cath-bhuidhne, le mòran theaghlaichean a' coimhead orra air na sràidean.

Lean am poball a' phairèid a-steach dhan phàirc agus chruinnich iad còmhla ri seann shaighdearan bho Earra-Ghàidhealaich Inbhir Chluaidh, Earra-Ghàidhealaich Ghrianaig, buill de Lìonra Seann Shaighdearan Inbhir Chluaidh agus Caideatan an Airm is an Adhair, a sheas ann an loidhne aig beulaibh a' phàillean far an deach an t-seirbheis a chumail.

Thòisich an t-seirbheis le fàilte bho Mhorair-ionaid a' Chruinn airson Siorrachd Rinn Friù, an Còirneal Peter McCarthy. An uair sin, bhruidhinn Probhaist Inbhir Chluaidh, Drew McKenzie, agus thug e sgrola Saorsa Inbhir Chluaidh dhan Mhàidsear-seanalair Robin Lindsay CBE, Còirneal Rèisimeid Rìoghail na h-Alba.

Às dèidh òraid a' Mhàidsear-seanalair Robin Lindsay a thug an t-seirbheis gu crìch, lean an rèisimeid oirre a' caismeachd gu cuirm phrìobhaideach aig Bun-sgoil Ghurraig faisg air làimh.

Thuirt am Probhaist Drew McKenzie às dèidh làimh: "B' e tachartas air leth a bha seo agus tha mi fìor thoilichte gun tàinig uimhir de dhaoine ann gus pàirt a ghabhail ann.

"Is e Rèisimeid Rìoghail na h-Alba a' chiad tè riamh a fhuair Saorsa Inbhir Chluaidh, agus tha e iomchaidh gun do choisinn iad an t-urram seo anns an fhicheadamh bliadhna aca."

"Bha coltas sgoinneil, mar as àbhaist, air Pàirc a' Bhataraidh agus bha faireachdainn mhìorbhaileach ann.

"Tha e cudromach gun aithnich sinn na fir is boireannaich gaisgeil à Inbhir Chluaidh a tha air a bhith sna feachdan armaichte - agus a tha fhathast a' dèanamh sin - agus 's e dòigh eachdraidheil a bha seo dhuinn gus sin a dhèanamh."

Thuirt am Màidsear-seanalair Robin Lindsay CBE, Còirneal Rèisimeid Rìoghail na h-Alba: "Is e urram dha-rìribh a th' ann a bhith mar a' chiad luchd-faighinn Saorsa Inbhir Chluaidh, coimhearsnachd leis a bheil ceangal beairteach is maireannach ri Rèisimeid Rìoghail na h-Alba.

"Tha an àireamh de sheann shaighdearan air a' phairèid a' sealltainn gu soilleir gu bheil taic làidir ann san sgìre agus ceangal làidir againn rithe."

"Bu mhath leinn taing a thoirt do Chomhairle Inbhir Chluaidh airson an cuid aoigheachd fhialaidh agus airson am fàilte bhlàth do Rèisimeid Rìoghail na h-Alba."

Thuirt Morair-ionaid a' Chrùin Peter McCarthy: "'S e urram nach beag a th' ann Saorsa Inbhir Chluaidh a bhuileachadh air Rèisimeid Rìoghail na h-Alba, a tha na shamhla air an earbsa agus an spèis eadar an Rèisimeid agus a' choimhearsnachd ionadail, agus fear a tha a' togail air ceanglaichean eachdraidheil a tha a' dol air ais chun a' Chiad Chogaidh."

"Leigidh urram mar sin air aonad a bhith a' caismeachd tron bhaile le brataichean ag itealaich, drumaichean gam bualadh agus le bèigneidean an sàs."

"Bha e fìor bhrosnachail uimhir fhaicinn bhon choimhearsnachd ionadail ann am Pàirc a' Bhataraidh agus iad cruinnichte ri taobh slighe na pairèid gus an ceangal cudromach seo eadar Rèisimeid Rìoghail na h-Alba agus Inbhir Chluaidh a dhaingneachadh."

'S e Rèisimeid Rìoghail na h-Alba a' chiad rèisimeid riamh a fhuair Saorsa Inbhir Chluaidh.

Chaidh an t-urram aontachadh le comhairlichean an-uiridh gus seirbheis, dìcheall agus ìobairt na Rèisimeid, agus na ceanglaichean làidir eachdraidheil aca ri Inbhir Chluaidh, a chomharrachadh.

Chaidh Rèisimeid Rìoghail na h-Alba a chruthachadh ann an 2006 nuair a chaidh sia Rèisimeidean Albannach eachdraidheil a chur còmhla.

Tha diofar Chath-bhuidhnean anns an Rèisimeid, gach tè a' cumail dìleab nan rèisimeidean às an deach an cruthachadh beò. Is iad sin Na h-Albannaich Rìoghail, Crìochadairean Albannach an Rìgh Fhèin, Fiùsailearan Rìoghail na Gàidhealtachd, Am Freiceadan Dubh, na Gàidheil, Rèisimeid Earra Ghàidheal is Chataibh - an rèisimeid eachdraidheil aig Inbhir Chluaidh.

Tha an Rèisimeid air a bhith an sàs ann an iomadh còmhrag agus misean sìthe air feadh an t-saoghail, a' gabhail a-steach obrachaidhean ann an Iraq, Afganastan agus na Balkans, agus tha iad air iomadh moladh a chosnadh.

A bharrachd air na coileanaidhean armailteach aice, tha Rèisimeid Rìoghail na h-Alba air ceanglaichean làidir a chumail ri coimhearsnachdan ionadail air feadh na h-Alba, a' gabhail a-steach Inbhir Chluaidh, tro bhith an sàs ann an tachartasan coimhearsnachd, gnìomhan carthannais, agus taic do sheann shaighdearan.

Page last updated: 11 September 2026