Ministri Vengu përuron godinën e rindërtuar të Qendrës së Personelit të Rekrutimit

Ministri Vengu përuron godinën e rindërtuar të Qendrës së Personelit të Rekrutimit

Ministri i Mbrojtjes, z. Pirro Vengu, i shoqëruar nga shefi i SHP të FA gjenerallejtënant Arben Kingji, vizitoi sot godinën e rindërtuar të Qendrës së Personelit të Rekrutimit (QPR), e cila, tashmë, ofron kushte moderne dhe funksionale për zhvillimin e aktivitetit të përditshëm.

Fotogaleria

Punimet e realizuara në më pak se një vit, kanë përfshirë një sipërfaqe prej 3.700 metrash katrorë dhe kanë sjellë përmirësime të thelluara në të gjitha ambientet. Projekti ka synuar modernizimin e infrastrukturës, përmirësimin e kushteve të punës dhe rritjen e efikasitetit në shërbim të personelit dhe qytetarëve. Qendra e Personelit të Rekrutimit, ofron edhe shërbime digjitale përmes Zyrës së Shërbimeve Online, ku vetëm gjatë muajit të fundit janë ofruar mbi 4000 shërbime në 7 kategori të ndryshme, që u drejtohen ushtarakëve aktivë, ish-ushtarakëve, civilëve dhe qytetarëve, që kanë kryer shërbim ushtarak.

[Link]

Ministri Vengu vlerësoi punën e kryer dhe theksoi rëndësinë e krijimit të kushteve dinjitoze për personelin: "Më vjen mirë që jeni tashmë në kushte të rehabilituara, sepse një nga detyrat kryesore është përkujdesja për ecurinë e karrierës. Duhet të vijojmë me digjitalizimin e proceseve në mënyrë që rekrutimet, trajnimet dhe certifikimet të kryhen sa më transparente dhe thjeshtë", - u shpreh ministri Vengu.

Ai shtoi se digjitalizimi dhe meritokracia janë në qendër të reformës që po zbatohet në sistemin e Mbrojtjes: "Me kushte më cilësore dhe me automatizimin e një pjese të proceseve, do të rrisim perceptimin dhe bindjen që kanë të gjithë se në këtë strukturë ekziston meritokracia dhe secilit i jepet e drejta që meriton" , - theksoi ministri.

[Link]
Ky investim përbën një hap të rëndësishëm drejt përmirësimit të standardeve të punës dhe përforcon angazhimin e Qendrës së Personelit të Rekrutimit për të ofruar shërbime gjithnjë e më cilësore, transparente dhe në përputhje me standardet bashkëkohore të Forcave të Armatosura.

[Link]