Ministry of Foreign Affairs of the Republic of Armenia
Ministry of Foreign Affairs of the Republic of Armenia
08/28/2026 | Press release | Archived content
ՀՀ ԱԳՆ ղեկավար կազմի և արտերկրում ՀՀ դիվանագիտական ներկայացուցչությունների ղեկավարների տարեկան աշխատաժողով. մաս 2
ՀՀ ԱԳՆ ղեկավար կազմի և արտերկրում ՀՀ դիվանագիտական ներկայացուցչությունների ղեկավարների տարեկան աշխատաժողով. մաս 2
28 օգոստոսի, 2026ՀՀ դիվանագիտական ծառայության մարմինների ղեկավար կազմի տարեկան աշխատաժողովի շրջանակներում անցկացվել է ՀՀ կառավարության ծրագրի տնտեսական բաղադրիչին, ՀՀ տնտեսական զարգացման առաջնահերթություններին ու հեռանկարներին, միջազգային առևտրային կապերի խթանմանը նվիրված քննարկումների երկօրյա շարք։
Բանախոսությունների շարքի մեկնարկին ողջույնի խոսքով հանդես է եկել ՀՀ ԱԳ նախարար Արարատ Միրզոյանը՝ նախարարության գործառույթների ընդլայնման, արտաքին առևտրի բաղադրիչի ինստիտուցիոնալ ամրագրման համատեքստում կարևորելով տվայլ ուղղությամբ կարողությունների շարունակական զարգացումը և դիվանագիտական ներկայացուցչությունների միջոցով Հայաստանի տնտեսական շահերի հետևողական առաջմղումը։
Բանախոսությամբ է հանդես եկել ՀՀ էկոնոմիկայի նախարար Գևորգ Պապոյանը՝ ներկայացնելով ՀՀ կառավարության տնտեսական զարգացման ներկայիս ցուցանիշները և կառավարության նոր ծրագրով ակնկալվող արդյունքները, Հայաստանի տնտեսական զարգացման հիմնական ուղղությունները:
Տնտեսական հարաբերությունների դիվերսիֆիկացիայի համատեքստում անդրադարձ է կատարվել նոր ուղղություններով գործընկերությունների զարգացման դինամիկային, արձանագրված արդյունքներին, գործարար կապերի հետևողական խթանման կարևորությանը:
Բանախոսությամբ է հանդես եկել ՀՀ փոխվարչապետ Մհեր Գրիգորյանի գրասենյակի ղեկավար Վիկտորիա Այդինյանը և ներկայացրել ՀՀ կառավարության հաստատած Հայաստանի տնտեսական և ինստիտուցիոնալ վերափոխման դոկտրինի հիմնական դրույթները՝ ընդգծելով, որ փաստաթուղթը կոչված է ձևավորելու երկրի երկարաժամկետ տնտեսական քաղաքականության միասնական տեսլականը։
Անդրադարձ է կատարվել դոկտրինի գերակա ուղղություններին, ՀՀ կառավարության ծրագրում վերջինիս արտացոլմանը, ինչպես նաև դոկտրինից բխող ռազմավարություններին։ Ընդգծվել է, որ դոկտրինը մշակվել է տարածաշրջանում խաղաղության նոր միջավայրի ձևավորման պայմաններում և որպես հիմնական նպատակ է հետապնդում ՀՀ քաղաքացու բարեկեցության ապահովումը։
ՀՀ Կենտրոնական բանկի նախագահի տեղակալ Արմեն Նուրբեկյանը ներկայացրել է գլոբալ մակրոտնտեսական իրավիճակը և միտումները, ՀՀ տնտեսության վրա դրանց ազդեցությունը, ընթացիկ զարգացումները և տնտեսական աճի դինամիկան:
Ծավալվել է հանգամանալից քննարկում դինամիկ փոփոխվող միջավայրում ՀՀ տնտեսական դիմակայունության ապահովմանն ուղղությամբ իրականացվող և հետագա հնարավոր քայլերի շուրջ։
«Modex» խորհրդատվական ընկերության տնօրեն Հայկազ Ֆանյանը ներկայացնել է ՀՀ արտահանման ռազմավարությունը:
Անդրադարձ է կատարվել Հայաստանի արտահանման ներկայիս կառուցվածքին, արտահանման ներուժի զարգացման հնարավորություններին, ինչպես նաև հայկական արտադրանքի համար նոր շուկաների հասանելիության ընդլայնման հեռանկարներին:
Բանախոսությանը հաջորդել է մտքերի փոխանակում: Քննարկվել են արտահանման խթանմանն ուղղված հիմնական մոտեցումները և այդ համատեքստում Հայաստանի դիվանագիտական ներկայացուցչությունների հնարավոր քայլերը:
«Էնթերփրայզ Արմենիա» հիմնադրամի տնօրեն Գոհար Աբաջյանի բանախոսության շրջանակներում Հայաստան օտարերկրյա ներդրումների ներգրավման, ինչպես նաև Հայաստանից արտահանման խթանման ուղղությամբ առաջիկա անելիքների համատեքստում ծավալվել է ակտիվ քննարկում ներդրումային և արտահանման ներուժի արդյունավետ իրացման, համապատասխան միջազգային գործարար կապերի ձևավորման ու զարգացման հեռանկարների շուրջ:
Քննարկվել են նաև միջազգային հեղինակավոր ֆորումներին և տնտեսական ուղղվածության այլ հարթակներում մասնակցության հնարավորությունները:
Անդրադարձ է կատարվել բիզնես-պետություն, բիզնես-բիզնես կապերի զարգացման, ներդրումային և արտահանման գործընթացներում դիվանագիտական ծառայության մարմինների ներգրավածության և անհրաժեշտ գործիքակազմի կիրառման կարևորությանը:
Քննարկումները շարունակվել են համաշխարհային բանկի ներկայացուցիչների հետ տեսակապի ձևաչափով։ Անդրադարձ է կատարվել «Խաղաղության խաչմերուկ» նախագծի իրականացման հետևանքով բացվող տնտեսական հնարավորություններին, տարածաշրջանային փոխկապակցվածության զարգացման հեռանկարների և տրանսպորտային կապերի ընդլայնման ներուժին, ինչպես նաև` համաշխարհային բանկի կողմից իրականացված համապատասխան հետազոտությանը:
«COP17. Հայաստանի ճանապարհը դեպի կենսաբազմազանության համաժողով» թեմայով բանախոսությամբ հանդես է եկել նաև ՀՀ շրջակա միջավայրի նախարար Համբարձում Մաթևոսյանը։ Նախարարը ներկայացրել է Հայաստանի՝ որպես ՄԱԿ-ի «Կենսաբանական բազմազանության մասին» կոնվենցիայի կողմերի 17-րդ համաժողովը (COP17) հյուրընկալող և նախագահող երկրի դերակատարությունը, նախագահության ռազմավարական առաջնահերթությունները և ներառական համաժողովի ապահովման ուղղությամբ աշխատանքների ընթացքը։
Ընդգծվել է, որ 2026 թվականի հոկտեմբերին Երևանում կայանալիք համաժողովը համաշխարհային բնապահպանական օրակարգի կարևորագույն իրադարձություններից է. դրան կմասնակցեն Կոնվենցիայի անդամ 196 կողմերի ներկայացուցիչներ, իսկ COP17-ին կնախորդի Առաջնորդների գագաթնաժողովը։
ԱԳ նախարարի տեղակալ Ռոբերտ Աբիսողոմոնյանը ներկայացրել է համաժողովի նախապատրաստման ուղղությամբ և մշակվող փաստաթղթերի շուրջ բանակցություներում ԱԳՆ և դիվանագիտական ծառայության մարմինների կողմից իրականացված աշխատանքները։
ՇՄ նախարարը և ԱԳ նախարարի տեղակալը պատասխանել են ներկաներին հետաքրքրող հարցերին։
Տեղի է ունեցել նաև այցելություն «Firebird AI»-ի և համաշխարհային տեխնոլոգիական ընկերություն NVIDIA-ի համագործակցությամբ Հրազդան քաղաքում ստեղծված արհեստական բանականության գործարան:
Շրջայցի ընթացքում մասնակիցները ծանոթացել են Հայաստանում աննախադեպ դինամիկայով զարգացող տեղեկատվական տեխնոլոգիաների ոլորտում ստեղծված հեռանկարներին: Ընդգծվել է ՀՀ-ԱՄՆ ռազմավարական գործընկերության դերը Հայաստանի տեխնոլոգիական էկոհամակարգի զարգացման և երկրի նորարարական ներուժի իրացման գործում:
-
ՀՀ ԱԳՆ կենտրոնական ապարատի ղեկավար կազմի և արտերկրում դիվանագիտական ներկայացուցչությունների ղեկավարների տարեկան աշխատաժողովի լուսանկարները հասանելի են հետևյալ հղումով:
Ministry of Foreign Affairs of the Republic of Armenia published this content on August 28, 2026, and is solely responsible for the information contained herein. Distributed via Public Technologies (PUBT), unedited and unaltered, on September 04, 2026 at 06:12 UTC. If you believe the information included in the content is inaccurate or outdated and requires editing or removal, please contact us at [email protected]