STQARRIJA MILL-MINISTERU GĦALL-KULTURA, L-ARTIJIET U L-GVERN LOKALI Avvanz fix-xogħlijiet ta’ restawr fil-Bastjun ta’ San Nikola f’Bormla

Il-Ministru għall-Kultura, l-Artijiet u l-Gvern Lokali Owen Bonnici u s-Segretarju Parlamentari għall-Gvern Lokali Alison Zerafa Civelli żaru x-xogħol li qed isir fuq il-Bastjun ta' San Nikola, Bormla. Ix-xogħlijiet fuq is-sit bdew f'Novembru 2025 taħt is-superviżjoni tad-Dipartiment tar-Restawr u l-Preservazzjoni.

Wara diversi xhur ta' xogħol preparatorju - inkluż dokumentazzjoni dettaljata tas-sit, applikazzjoni għall-permess tal-ippjanar, u l-ħruġ ta' sejħa pubblika għat-tenders - issa bdew ix-xogħlijiet tar-restawr. Waħda mill-isfidi ewlenin tal-proġett hija l-aċċess għas-sit.

Il-Ministru Owen Bonnici spjega kif matul it-Tieni Gwerra Dinjija parti mill-ġenb ta' fuq tal-bastjun kienet intlaqtet b'mod serju mill-bombi. Kompla li għalhekk kien meħtieġ li din il-parti terġa' tinbena bħala parti mill-proġett ta' restawr li bħalissa għaddej. Dan ix-xogħol qed isir b'attenzjoni kbira u b'rispett lejn il-wirt storiku sabiex il-bastjun jerġa' jieħu l-forma u d-dehra oriġinali tiegħu. "Il-proġett għandu l-għan li jikkonserva u jsaħħaħ il-valur storiku u kulturali tal-Bastjun ta' San Nikola," temm jgħid il-Ministru Bonnici.

Is-Segretarju Parlamentari Alison Zerafa Civelli qalet kif din hija parti oħra minn proġett ħolistiku tar-restawr tal-linja ta' fortifikazzjonijiet tal-Kottonera li l-patrimonju tagħhom hu wieħed imprezzabbli. Hija nnotat b'sodisfazzjon il-mod kif qed jitmexxa dan il-proġett u spjegat kif dan il-proġett, flimkien ma' oħrajn ta' restawr fil-Kottonera, qed isiru mill-Gvern bl-impenn tal-Kunsilli Lokali u l-Fondazzjoni Kottonera sabiex il-patrimonju ta' pajjiżna jiġi salvagwardjat.

"Il-lokalitajiet tal-Port u ċioè l-Kottonera huma rikki bil-fortifikazzjonijiet u diversi binjiet storiċi li jagħmlu parti sostanzjali mill-patrimonju kulturali ta' pajjiżna. Illum, ħafna turisti li jżuru pajjiżna jfittxu niċeċ storiċi u kulturali moħbija fil-lokalitajiet. It-turiżmu huwa wieħed mill-pilastri ekonomiċi ta' pajjiżna u fl-aħħar snin, grazzi għall-investiment bla preċedent mill-Gvern bil-kollaborazzjoni tal-Kunsilli Lokali, il-Kottonera saret parti minn gżirietna imfittxija sew mit-turisti u għalhekk huwa importanti li nkomplu nindukraw dan il-patrimonju," qalet is-Segretarju Parlamentari Zerafa Civelli.

Il-Perit inkarigata mix-xogħol Jean Frendo spjegat kif ix-xogħol beda bil-bini ta' armar tul il-parti l-aktar interna tal-Bastjun ta' San Nikola, u għal madwar 15-il metru tul il-faċċata tal-bastjun. L-interventi ta' restawr jinkludu fost oħrajn tiswijiet b'kisi bbażat fuq taħlita ta' ġir 'hydraulic lime', tibdil tal-aktar ġebel deterjorat, il-bini tal-parti meqruda matul il-gwerra, u l-mili tal-fili b'taħlita bbażata fuq il-ġir hydraulic lime. Il-Perit Frendo kompliet tispjega li r-restawr taż-żona milquta mill-bombi beda bit-tneħħija bir-reqqa tal-ġebel li kien sar perikoluż minħabba li ċċaqlaq. Il-partijiet li se jinbnew mill-ġdid se jsegwu l-karatteristiċi arkitettoniċi oriġinali sabiex terġa' tiġi rrestawrata l-leġġibbiltà tal-monument.

​​Preżenti għal din iż-żjara kien hemm iċ-Charmain tal-Fondazzjoni Kottonera Joe Mizzi.

​