STQARRIJA MILL-MINISTERU GĦALL-AMBJENT, L-ENERĠIJA U L-INDAFA PUBBLIKA Jitniedu inizjattivi ġodda tal-enerġija rinnovabbli għall-familji u n-negozji

Il-Ministru għall-Ambjent, l-Enerġija u l-Indafa Pubblika Miriam Dalli, flimkien mar-Regolatur għas-Servizzi tal-Enerġija u l-Ilma (REWS), nediet l-inizjattivi tal-enerġija rinnovabbli għall-2026 li se jkomplu jħaffu t-tranżizzjoni ta' Malta lejn enerġija aktar nadifa u sostenibbli.

"Dan il-pakkett jirrifletti l-impenn kontinwu tal-Gvern biex nimxu 'l quddiem fit-tranżizzjoni tal-enerġija f'Malta. Qegħdin ninvestu kemm f'infrastruttura fuq skala kbira kif ukoll fil-familji, biex niżguraw li kemm il-familji kif ukoll in-negozji jibbenefikaw minn enerġija aktar nadifa u aktar affordabbli, filwaqt li nsaħħu s-sigurtà u r-reżiljenza tal-enerġija nazzjonali," qalet il-Ministru Miriam Dalli.

Il-Kap Eżekuttiv tar-REWS, Ing. Maria Aquilina, żiedet: "Dawn l-inizjattivi huma mfassla biex jagħmlu l-enerġija rinnovabbli aktar aċċessibbli f'kull livell. Minn proġetti kbar sa sistemi domestiċi, ir-REWS tibqa' impenjata li tappoġġja lill-applikanti permezz ta' gwida ċara u implimentazzjoni effettiva."

Il-pakkett jinkludi inizjattivi ta' enerġija rinnovabbli għall-familji u għall-industriji fi tliet kategoriji separati. Dawn huma: skemi ta' sapport għall-familji li jappoġġja investiment f'sistemi fotovoltajċi u ħażna tal-batteriji flimkien ma' Feed-in Tariff; Feed-in Tariff għal installazzjonijiet taħt l-40kWp (applikabbli kemm għal sistemi residenzjali kif ukoll għal dawk li mhumiex residenzjali); u l-Invitations to Bid (ITBs) tal-2026 għal proġetti ta' enerġija rinnovabbli fuq skala kbira.

Permezz tal-ITBs, il-Gvern se joffri kuntratti ta' 20 sena għal premium għal kull kilowatt-hour (kWh) ġġenerat. Il-proġetti se jintgħażlu permezz ta' proċess kompetittiv imsejjaħ "pay-as-bid" ibbażat fuq l-effiċjenza tal-ispejjeż u l-kapaċità disponibbli. Fl-2026, se jsiru żewġ sejħiet li jinkludu ITB waħda għal kull waħda mill-kategoriji ta' 40kW sa inqas minn 200kW u ta' 200kW sa inqas minn 1MW, li se jsiru fl-istess ħin. Il-kapaċità disponibbli għal kull sejħa se tkun ta' 2.5MW (40kW sa inqas minn 200kW) u 5000kW (200kW sa inqas minn 1MW). Dan ifisser li total ta' 15MW se jkun disponibbli għall-allokazzjoni. Il-prezz tal-offerta se jkun limitat għal €0.14/kWh. Sejħa separata għal installazzjonijiet ta' enerġija rinnovabbli ta' 1MW jew aktar se jkollha allokazzjoni ta' 38MW. Il-prezz massimu permess għall-offerti se jkun bejn €0.094/kWh u €0.177/kWh, skont it-tip u l-kategorija tal-installazzjoni.

Il-familji u entitajiet li jinstallaw sistema fotovoltajka fuq skala żgħira taħt l-40kWp, u li ma jibbenefikawx minn għotja, se jkomplu jirċievu Feed-in Tariff ta' €0.15/kWh, garantit għal 20 sena, b'allokazzjoni totali ta' 8MWp fl-2026. Matul l-aħħar tliet snin, 9.2MWp ingħataw Feed-in Tariff ta' €0.15/kWh mingħajr għotja.

Fl-istess ħin, ir-REWS se tkun qed tamministra skemi ta' enerġija rinnovabbli għall-familji b'baġit totali ta' €15.3 miljun, inklużi €4.1 miljun għal sistemi fotovoltajċi u €11.2 miljun għall-ħażna tal-batteriji. L-applikazzjonijiet jiftħu fl-20 ta' April 2026 u jibqgħu miftuħa sa Novembru 2026, jew sakemm jispiċċaw il-fondi.

L-iskema ta' sapport RES toffri tliet għażliet: sistema PV b'inverter ibridu; inverter ibridu/batterija flimkien ma' ħażna tal-batteriji; jew ħażna tal-batteriji biss. Sidien ta' installazzjonijiet fotovoltajċi fuq proprjetajiet residenzjali (anke dawk li ma jibbenefikawx minn ebda għajnuna fuq is-sistema fotovoltajka, jiġifieri mingħajr feed-in tariff jew għotja) u li ilhom konnessi mal-grid għal mill-inqas sitt snin jistgħu japplikaw għal inverter ibridu/batterija u ħażna tal-batteriji.

Se jkun hemm ukoll inċentiv finanzjarju addizzjonali ta' 5% għall-iskema ta' għotjiet għal tagħmir li jikkonforma mal-Net-Zero Industry Act (NZIA) tal-UE, li jippromwovi l-produzzjoni u l-adozzjoni ta' teknoloġiji ta' enerġija nadifa madwar l-Ewropa.

​