Kundëradmiral Arsen Mullaj merr detyrën e Komandantit të Forcës Detare, ministri Vengu: Modernizimi, prioritet strategjik i qeverisë

Kundëradmiral Arsen Mullaj merr detyrën e Komandantit të Forcës Detare, ministri Vengu: Modernizimi, prioritet strategjik i qeverisë

Në një ceremoni të posaçme, Kundëradmiral Arsen Mullaj mori zyrtarisht detyrën e Komandantit të Forcës Detare, pas dekretimit nga Presidenti i Republikës. Ai zëvendëson në këtë detyrë Nënadmiral Adnand Agastra, i cili përfundon mandatin e tij në krye të Forcës Detare.

Fotogaleria

[Link]

Në ceremoninë e dorëzimit të detyrës mori pjesë Ministri i Mbrojtjes, Pirro Vengu, i cili vlerësoi ndërrimin e komandës si pjesë të vazhdimësisë profesionale dhe forcimit të lidershipit në Forcat e Armatosura. Ministri Vengu shprehu mirënjohje për kontributin dhe lidershipin e treguar nga Nënadmiral Agastra gjatë një karriere të gjatë në shërbim të vendit.

Në fjalën e tij, Ministri Vengu theksoi angazhimin e qeverisë shqiptare për rimëkëmbjen dhe modernizimin e Forcës Detare, duke e cilësuar dimensionin detar si një prioritet strategjik kombëtar.

[Link]

"Në mbi 30 vite tranzicion, Forca Detare është tkurrur gradualisht dhe është mbështetur kryesisht në profesionalizmin e personelit të saj, njerëzve në uniformë, aty ku mungonin mjetet, pajisjet, anijet dhe sistemet mbështetëse. Uroj realisht që, në muajt dhe vitet në vijim, së bashku me komandantin e ri dhe gjithë shtabin e Forcës Detare, të mundësojmë një rimëkëmbje graduale," u shpreh Ministri Vengu.

Sipas tij, kjo është një përparësi e qeverisë shqiptare, e artikuluar disa herë edhe nga Kryeministri, dhe në themel të saj qëndron rikthimi i vendit në horizontin e tij detar dhe adriatiko-jonian.
"Kjo nuk mund të ndodhë pa mjete, pa anije, pa luftanije dhe pa anije logjistike. Për këtë arsye, qeveria shqiptare ka angazhuar jo vetëm financimin e nevojshëm, por edhe kuadrin e duhur ligjor për ringritjen e Pashalimanit si një kantier strategjik, jo vetëm në dobi të forcave tona, por edhe të forcave aleate," theksoi Ministri i Mbrojtjes, Pirro Vengu.

[Link]

Në përfundim, Ministri Vengu uroi suksese Komandantit të ri, personelit të Forcës Detare dhe familjeve të tyre, duke theksuar synimin për ndërtimin e një Force Detare moderne, plotësisht të integruar në Aleancën e Atlantikut të Veriut dhe të gatshme për mbrojtjen e interesave kombëtare dhe sigurinë detare.

[Link]