Preto de 160 nenas participan na Coruña na xornada Oracle4Girls para espertar vocacións STEM

A actividade reuniu preto de 160 nenas de entre 4 e 16 anos, que participaron en distintos obradoiros prácticos de programación, robótica e intelixencia artificial, adaptados ás diferentes idades.

A concelleira de Benestar Social, Participación e Igualdade, Nereida Canosa, interveu esta mañá no peche da nova edición da xornada Oracle4Girls, unha iniciativa posta en marcha pola Universidade da Coruña destinada a fomentar as vocacións STEM -Ciencia, Tecnoloxía, Enxeñaría e Matemáticas- entre as nenas e rapazas novas e contribuír á redución da fenda de xénero no ámbito tecnolóxico.

A actividade reuniu preto de 160 nenas de entre 4 e 16 anos, que participaron en distintos obradoiros prácticos de programación, robótica e intelixencia artificial, adaptados ás diferentes idades. A xornada contou tamén coa asistencia de case un cento de nais e pais, que participaron nun programa paralelo de charlas centrado na importancia da educación científica e tecnolóxica.

Entre as relatoras estiveron Verónica Bolón Canedo, directora da Cátedra UDC-INDITEX de Intelixencia Artificial en Algoritmos Verdes, que impartiu a conferencia "Muller, Ciencia e Intelixencia Artificial"; Gema Vázquez Domínguez, coordinadora da área de Enxeñaría de Software en ALDABA, coa charla "Tecnoloxía sen mulleres, futuro incompleto"; e Paula María Castro Castro, profesora titular da Universidade da Coruña e adxunta de Empregabilidade, que falou sobre as oportunidades académicas e profesionais das carreiras STEM na conferencia "Entra no futuro: estuda STEM na Universidade da Coruña".

Canosa puxo en valor a importancia de manter viva a curiosidade científica desde idades temperás. Durante a súa intervención destacou que "a curiosidade é o punto de partida de toda vocación científica e é fundamental que as nenas non a perdan polo camiño. A ciencia e a tecnoloxía tamén son espazos nos que poden desenvolver todo o seu talento".Canosa subliñou tamén o papel dos referentes femininos no ámbito tecnolóxico, sinalando que iniciativas como Oracle4Girls permiten que as máis novas "poidan verse reflectidas en mulleres que lideran proxectos de investigación, innovación e desenvolvemento tecnolóxico".No acto participaron tamén Marta Sande Eslava, directora da Área de Solucións Tecnolóxicas Sectoriais da Axencia para a Modernización Tecnolóxica de Galicia (AMTEGA) e Ricardo Cao Abad, reitor da Universidade da Coruña. A xornada concluíu coa entrega de diplomas ás nenas participantes, como recoñecemento á súa implicación nas actividades desenvolvidas ao longo do día.