Guvernatori Ismaili pret misionin e Asistencës Teknike të FMN-së për avancimin e Stres-testit dhe Analizës së Rrezikut Sistemik

Guvernatori i Bankës Qendrore të Republikës së Kosovës (BQK), z. Ahmet Ismaili, i shoqëruar nga anëtarë të menaxhmentit, priti misionin e asistencës teknike (AT) nga Fondi Monetar Ndërkombëtar (FMN), në kuadër të bashkëpunimit të vazhdueshëm ndërmjet BQK-së dhe FMN-së.

Misioni i FMN-së fokusohet në përmbylljen e aktiviteteve të mbetura të asistencës teknike lidhur me analizën e rrezikut sistemik dhe stres-testin, si pjesë e aktiviteteve pasuese të diagnostikimit të Rishikimit të Stabilitetit të Sektorit Financiar të Kosovës. Ekipi i misionit përbëhet nga Dimitrios Laliotis, Dulani Seneviratne, Constantinos Kyriakopoulos dhe Jiri Panos. Vizita po zhvillohet nga 12 deri më 22 maj 2026.

Fillimisht Guvernatori Ismaili uroi mirëseardhje ekspertëve të FMN-së dhe shprehu mirënjohjen për mbështetjen e vazhdueshme të Fondit ndaj Bankës Qendrore të Republikës së Kosovës, duke riafirmuar përkushtimin e BQK-së për avancimin e kornizës së stabilitetit financiar, zbatimin e rekomandimeve të Rishikimit të mëparshëm të Stabilitetit të Sektorit Financiar të Kosovës, si dhe avancimin e mëtejmë të institucionalizimit të stres-testit si një mjet kyç për monitorimin e rrezikut sistemik dhe komponent i integruar i analizës së stabilitetit financiar. Përtej rezultateve të menjëhershme teknike, Guvernatori theksoi rëndësinë e ngritjes së kapaciteteve dhe transferimit të njohurive profesionale.

Diskutimet u fokusuan në prioritetet kryesore teknike, përfshirë kalibrimin e skenarëve makroekonomikë për stres-testim duke përdorur qasje statistikisht të bazuara, zbatimin e një ushtrimi të plotë të stres-testimit të solvencës, avancimin e stres-testimit të likuiditetit përmes skenarëve të stresit të Treguesit të Mbulimit me Likuiditet (LCR) specifik për banka dhe fillimit të analizës së likuiditetit të bazuar në rrjedhën e parasë, si dhe zhvillimin e mëtejshëm të analizës së likuiditetit në nivel të sistemit.

Nga ana tjetër, ekspertët e FMN-së vlerësuan bashkëpunimin konstruktiv të BQK-së, përkushtimin e lartë institucional dhe progresin e rëndësishëm të arritur nga ekipi në avancimin e punës teknike lidhur me analizën e rrezikut sistemik dhe stres-testin.

Projekti pritet të forcojë edhe më tej kapacitetet analitike të BQK-së, të përmirësojë cilësinë dhe kredibilitetin e kornizës së stres-testimit dhe të mbështesë një qasje më të integruar në monitorimin e rreziqeve të solvencës dhe likuiditetit në të gjithë sistemin bankar.

Gjatë misionit, ekspertët e FMN-së do të punojnë ngushtë me stafin e BQK-së përmes sesioneve praktike teknike, duke mbështetur realizimin e ushtrimeve të stres-testimit dhe identifikimin e boshllëqeve të mbetura në të dhëna, modelim dhe analizë. Gjetjet dhe rekomandimet nga ky mision do të informojnë agjendën e ardhshme të punës së BQK-së dhe do të kontribuojnë në forcimin e vazhdueshëm të kornizës së stabilitetit financiar të Kosovës, në përputhje me praktikat më të mira ndërkombëtare.