STQARRIJA MILL-MINISTERU GĦALL-KULTURA, L-ARTIJIET U L-GVERN LOKALI U MIS-SEGRETARJAT PARLAMENTARI GĦAŻ-ŻGĦAŻAGĦ, IR-RIĊERKA U L-INNOVAZZJONI Il-Forti Binġemma jiġi trasferit[...]

Il-Gvern nieda uffiċjalment l-inizjattiva ta' Space Park Malta permezz tat-trasferiment tal-Forti storiku ta' Binġemma lil Xjenza Malta. Din it-trasformazzjoni se tagħti ħajja ġdida lil sit militari magħluq, billi tikkonvertih f'ċentru nazzjonali għax-xjenza, l-edukazzjoni u l-innovazzjoni.

L-aħbar tħabbret f'Villa Bighi mill-Ministru għall-Kultura, l-Artijiet u l-Gvern Lokali, Owen Bonnici.

Fl-intervent tiegħu, il-Ministru Owen Bonnici sostna li, "Il-Forti Binġemma għandu valur storiku u kulturali kbir, u permezz ta' din it-trasformazzjoni se jsir ukoll simbolu ta' kif il-wirt tagħna jista' jinbidel f'mutur ta' tkabbir xjentifiku u edukattiv. B'dan il-pass, qegħdin nuru kif Malta tista' tqiegħed l-identità storika tagħha bħala pedament għal futur ta' innovazzjoni u tagħlim."

Fl-assenza tas-Segretarju Parlamentari għaż-Żgħażagħ, ir-Riċerka u l-Innovazzjoni Keith Azzopardi Tanti, li kien indispost, il-Kap Eżekuttiv ta' Xjenza Malta, Silvio Scerri, qal li, "Dan il-proġett jirrappreżenta għażla ċara li l-wirt tagħna għandu jaħdem għall-ġid pubbliku u mhux jibqa' wieqaf jew minsija. Permezz ta' Space Park Malta, qegħdin nagħtu spazju fejn ix-xjenza u l-innovazzjoni jiltaqgħu mal-edukazzjoni u l-familji, u b'hekk nibnu futur ibbażat fuq l-għarfien u l-opportunità. Din hija parti mill-Viżjoni Malta 2050 li tħares lejn pajjiż aktar reżiljenti u kompetittiv fis-setturi emerġenti."

Space Park Malta se jiġi żviluppat b'rispett sħiħ lejn il-karattru storiku tal-forti, filwaqt li joffri infrastruttura moderna bħaċ-Ċentru għall-Osservazzjoni tad-Dinja biex jintuża dejta bis-satellita għas-sikurezza marittima, il-monitoraġġ ambjentali u l-użu tal-art. Il-park se jinkludi wkoll l-Osservatorju tar-Ricerka kif ukoll wieħed pubbliku, li jagħti lill-istudenti u lill-familji aċċess għas-smewwiet permezz ta' tagħlim iggwidat, kif ukoll Esplora Space li se jkun il-qalba tal-park bil-wirjiet, il-programmi għall-iskejjel u l-attivitajiet ta' sensibilizzazzjoni.

Il-proġett jinkludi wkoll librerija pubblika diġitali u tradizzjonali, faċilitajiet għall-ħolqien tal-midja, u spazji kollaborattivi għat-tagħlim u l-innovazzjoni. Barra minn hekk, se joffri ambjent iddedikat għall-istart-ups fil-qasam spazjali, b'għan li jrawwem ekosistema ekonomika ġdida li tgħaqqad l-intraprenditorija u x-xjenza.

Is-sostenibbiltà se tkun parti integrali mid-disinn, bl-użu ta' enerġija solari, sistemi intelliġenti ta' ġestjoni tal-enerġija, ħsad ta' ilma tax-xita, ġonna pubbliċi u spazji miftuħa bi tħawwil indiġenu u dawl li jħares is-smewwiet notturni Maltin.

It-trasformazzjoni tal-Forti Binġemma fi Space Park Malta tissimbolizza impenn nazzjonali biex pajjiżna jonora l-passat, jarrikkixxi l-preżent u jipprepara futur mibni fuq ix-xjenza, l-edukazzjoni u l-innovazzjoni.