Il-komunitajiet madwar Malta qed jibbenefikaw minn aktar spazji miftuħa u mfassla aħjar - u l-Birgu mhuwiex eċċezzjoni. Fil-Birgu, ix-xogħlijiet ta' tisbiħ f'wieħed mis-siti waslu fi tmiemhom filwaqt li ser jibda t-tieni proġett kbir, dak ta' spazju miftuħ ġdid, immexxi mill-Korporazzjoni għar-Riġenerazzjoni tal-Port il-Kbir (GHRC).

Il-Ministru għall-Ambjent, l-Enerġija u l-Indafa Pubblika, Miriam Dalli, flimkien mas-Segretarju Parlamentari għall-Indafa Pubblika, Glenn Bedingfield, żaru ż-żewġ siti flimkien mar-rappreżentanti tal-GHRC u Ambjent Malta, kif ukoll is-Sindku tal-Birgu, John Boxall.

Waħda minn dawn iż-żjarat immarkat il-bidu tax-xogħlijiet fuq is-sit li kien jintuża biex jinħażen iż-żejt - żona ta' 1500m² li se tinbidel f'ġnien stil Mediterranju mill-GHRC. L-ispazju se jinkludi pjanti indiġeni, żoni għall-piknik, mogħdijiet għall-mixi, u teatru miftuħ ta' 400m² għal attivitajiet. Dan jifforma parti mix-xogħlijiet usa' ta' riġenerazzjoni tal-GHRC madwar ix-xatt tal-Kalkara.

"Kemm jekk hi riġenerazzjoni kbira jew titjib fil-lokalitajiet, qed nadottaw modi olistiċi fost l-entitajiet kollha sabiex inressqu l-ispazji miftuħa eqreb lejn in-nies. Ix-xogħlijiet fil-Birgu huma eżempju ċar ta' kif qed noħolqu spazji komunitarji sbieħ, aċċessibbli u li jservu fit-tul. Dawn il-proġetti jibnu fuq inizjattivi ħodor oħra fil-lokalità, fosthom il-Ġnien fuq il-Glażiż, li jkompli jsaħħaħ in-netwerk ta' spazji miftuħa fil-Birgu," qalet il-Ministru Dalli.

Il-Kap Eżekuttiv tal-GHRC, Gino Cauchi, enfasizza d-disinn sostenibbli tal-ġnien. "Billi npoġġu saffi ta' 8ċm ġebel fuq 50ċm ta' ħamrija, qed innaqqsu t-telf ta' ilma u nappoġġjaw il-pjanti lokali. Permezz ta' għajn naturali li skoprejna waqt il-proġett tax-Xewkija se tmur dirett f'reservoirs li se jgħinu biex l-ispazju jinżamm b'mod sostenibbli."

Il-ministru żaret ukoll proġett minn Ambjent Malta fid-daħla tal-Birgu. B'investiment ta' €230,000 sar it-tqegħid mill-ġdid tal-ħamrija, landscaping u l-installazzjoni ta' membrane protettiv fuq xelters storiċi taħt l-art.

Id-Direttur Ġenerali ta' Ambjent Malta, Herman Galea, qal, "Dan il-proġett itejjeb il-kwalità ambjentali taż-żona filwaqt li jirrispetta l-karattru uniku tas-sit. Huwa eżempju ċar ta' kif nistgħu ngħaqdu t-titjib prattiku mas-sensittività lejn il-wirt storiku."