STQARRIJA MILL-UFFIĊĊJU TAD-DEPUTAT PRIM MINISTRU U L-MINISTERU GĦALL-AFFARIJIET BARRANIN U T-TURIŻMU Malta tospita l-1539 Laqgħa tal-Kumitat tad-Deputati tal-Ministri[...]

Id-Deputat Prim Ministru u Ministru għall-Affarijiet Barranin u t-Turiżmu, Ian Borg, fetaħ il-1539 laqgħa tal-Kumitat tad-Deputati tal-Ministri tal-Kunsill tal-Ewropa, li tlaqqgħet mill-Presidenza Maltija ta' din l-organizzazzjoni, fil-Palazz Verdala, it-Tlieta filgħodu.

Il-Kumitat tad-Deputati tal-Ministri jinkludi fih ir-Rappreżentanti Permanenti tal-Istati Membri tal-Kunsill tal-Ewropa, sabiex isegwu l-attivitajiet tal-organizzazzjoni u l-implimentazzjoni tad-deċiżjonijiet tagħha b'rabta mad-drittijiet tal-bniedem, id-demokrazija, u s-saltna tad-dritt.

Fid-diskors tiegħu bħala l-President tal-Kumitat tal-Ministri tal-Kunsill tal-Ewropa, Dr Borg enfasizza l-irwol kruċjali ta' dan il-Kunsill bħala gwida b'saħħitha, imsejsa fuq il-valuri, f'dinja dejjem aktar kumplessa, b'żieda fl-attakki kontra l-istituzzjonijiet internazzjonali, attentati biex tiġi mdgħajfa s-saltna tad-dritt, u theddidiet għall-valuri demokratiċi.

"Permezz tal-mandat uniku tiegħu, il-Kunsill jista' jkattar l-għaqda, isaħħaħ l-istandards demokratiċi, u jgħin biex nibnu futur imsejjes fuq il-paċi u l-ġustizzja," hu stqarr.

Id-Deputat Prim Ministru appella lill-Kunsill tal-Ewropa biex jispira impenn kollettiv aktar b'saħħtu billi jiżgura li x-xogħol tiegħu jkun aktar viżibbli u mifhum b'mod ċar, fis-soċjetà kollha, "għax fl-aħħar mill-aħħar, is-saħħa tal-valuri kondiviżi tagħna tiddependi mhux biss fuq kif niddefenduhom fi Strasburgu, imma wkoll fuq kif nifhmuhom, kif ngħixuhom u mmexxuhom 'il quddiem fil-komunitajiet, fl-iskejjel u fil-konverżazzjonijiet tan-nies madwar l-Ewropa kollha."

F'dan ir-rigward, huwa faħħar id-deċiżjoni tal-Presidenza Maltija li terġa' tintroduċi l-Laqgħa Ministerjali taż-Żgħażagħ tal-Kunsill tal-Ewropa, li ser issir fil-Belt Valletta din il-ġimgħa, wara nuqqas ta' 13-il sena. Din il-Laqgħa tikkonferma l-impenn kollettiv lejn is-sehem taż-żgħażagħ fit-tfassil tal-futur tal-Ewropa.

Hekk kif il-komunità internazzjonali fakkret it-tieni sena mill-attakk terroristiku tal-Ħamas fis-7 ta' Ottubru 2023, Dr Borg tenna s-sejħa ta' Malta għall-ħelsien immedjat tal-ostaġġi kollha, u għat-tmiem urġenti tal-kriżi umanitarja u t-tbatijiet li segwew f'Gaża f'dawn l-aħħar sentejn.

Huwa tkellem ukoll dwar il-gwerra t'aggressjoni tar-Russja kontra l-Ukrajna, u enfasizza l-impenn tal-Presidenza Maltija li tmexxi 'l quddiem l-isforzi biex jiġi stabbilit it-Tribunal Speċjali dwar ir-Reat ta' Aggressjoni - "għaliex mingħajr responsabbiltà, ma jistax ikun hemm rikonċiljazzjoni, u mingħajr ġustizzja, ma jistax ikun hemm paċi dejjiema."

Il-laqgħa tat-Tlieta tmexxiet mir-Rappreżentant Permanenti ta' Malta għall-Kunsill tal-Ewropa, Francesca Camilleri Vettiger, f'isem il-Presidenza Maltija. Kienet indirizzata wkoll mis-Segretarju Ġenerali tal-Kunsill tal-Ewropa, Alain Berset, u mill-President tal-Assemblea Parlamentari tal-Kunsill tal-Ewropa, Theodoros Rousopoulos.