Kristrún Frostadóttir forsætisráðherra átti í dag vinnufund með Jonas Gahr Støre forsætisráðherra Noregs í Osló. Á fundinum ræddu ráðherrarnir m.a. samstarf ríkjanna tveggja, öryggis- og varnarmál, málefni Norðurslóða og EES- og Evrópumál.

"Norðmenn eru ein af okkar nánustu vinaþjóðum og hafa staðið þétt við hlið okkar á alþjóðlegum vettvangi. Það er afar dýrmætt að eiga slíkan stuðning vísan, ekki síst á þeim viðsjárverðu tímum sem nú eru uppi í alþjóðamálum," segir Kristrún Frostadóttir forsætisráðherra.

"Tvíhliða samskipti Íslands og Noregs hafa alla tíð verið góð en upp á síðkastið hafa þau styrkst enn frekar, þökk sé mun jákvæðari tón en áður þegar kemur að fiskveiðimálum. Við eigum einstakt samband við Norðmenn, einkum í gegnum EES-samninginn og öflugt Norðurlandasamstarf. Við munum áfram leggja okkur fram við að efla þessi samskipti, sem byggja nú þegar á gríðarlega traustum grunni," segir Kristrún.

Afgerandi afstaða í málefnum Norðurslóða

EES-samningurinn og yfirvofandi þjóðaratkvæðagreiðsla um hvort hefja skuli aðildarviðræður við Evrópusambandið komu einnig til tals á fundinum. Forsætisráðherra Íslands kom því skýrt á framfæri að nauðsynlegt væri að standa vörð um EES-samninginn, óháð því hvernig þjóðaratkvæðagreiðslan fari. Bæði Ísland og Noregur eigi mikið undir því að EES-samningurinn standi sterkt.

"Við ræddum líka málefni Norðurslóða sem hafa verið í eldlínunni síðustu mánuði. Bæði ég og forsætisráðherra Noregs höfum verið afgerandi í afstöðu okkar hvað þau mál varðar. Við stöndum keik með Grænlandi. Nú þegar augu heimsbyggðarinnar eru á Norðurslóðum er mikilvægt að öll umræða byggi á virðingu fyrir fólkinu sem hér býr. Það er ólíðandi að ýjað sé að því að landamæri ríkja verði virt að vettugi," segir Kristrún.

"Bandalagsríki horfa sömuleiðis til okkar í auknum mæli í varnarmálum á svæðinu. Ísland hefur axlað þá ábyrgð í góðu samstarfi við t.d. Bandaríkin og Noreg, sem m.a. hafa sinnt loftýmisgæslu og viðveru á varnarsvæðinu í Keflavík. Það hefur reynst dýrmætt."