Fullgilding auðveldar samvinnu í rannsóknum á skipulagðri brotastarfsemi

Ísland hefur fullgilt aðra viðbótarbókun við Evrópusamninginn um gagnkvæma aðstoð í sakamálum. Fullgildingin auðveldar íslenskum stjórnvöldum og yfirvöldum annarra ríkja að vinna saman að rannsóknum og meðferð sakamála milli landa.

Með fullgildingu á samningnum er gildissvið hans útvíkkað þannig að hægt er að óska eftir aðstoð í fleiri tilvikum. Þetta á til að mynda við um skýrslutökur af vitnum og sérfræðingum í gegnum fjarfund eða síma auk þess sem finna má ákvæði sem auðveldar samskipti og framkvæmd réttabeiðna milli ríkja.

Dómsmálaráðherra lagði á síðasta ári fram frumvarp til breytinga á lögum um framsal sakamanna og aðra aðstoð í sakamálum. Eitt af markmiðum frumvarpsins var að gera Íslandi kleift að fullgilda viðbótarbókunina.

Þegar lagabreytingarnar voru samþykktar síðasta sumar voru lögfest þau lagaákvæði sem nauðsynleg voru til að íslensk stjórnvöld gætu staðið undir skuldbindingum viðbótarbókunarinnar. Breytingin gerir íslenskum yfirvöldum kleift að semja um þátttöku í sameiginlegum rannsóknarhópum með öðrum ríkjum Evrópuráðsins, sem er mikilvæg breyting í að styrkja löggæsluna í rannsóknum á skipulagðri glæpastarfsemi.