Samráð við Þýskaland um varnarmál og málþing um varnir á norðurslóðum ​

Þróun öryggismála, varnarviðbúnaður Atlantshafsbandalagsins og samstarf Íslands og Þýskalands í öryggis- og varnarmálum, með áherslu á viðbúnað á Norður-Atlantshafi, bar hæst í samráði Íslands og Þýskalands um varnarmál sem haldið var í Berlín í gær. Jónas Allansson, skrifstofustjóri varnarmálaskrifstofu, og Dr. Jasper Wieck, skrifstofustjóri í þýska varnarmálaráðuneytinu, leiddu viðræðurnar en samráðið fór fram á grundvelli sameiginlegrar yfirlýsingar ríkjanna um öryggis- og varnarmál sem skrifað var undir í Reykjavík í október síðastliðnum í Íslandsheimsókn varnarmálaráðherra Þýskalands, Boris Pistorius.

Sendiráð Íslands í Berlín stóð svo í dag fyrir málþingi um öryggismál á Norður-Atlantshafi og norðurslóðum, í samstarfi við sendiráð Danmerkur, Kanada og Noregs, auk þýska varnarmálaráðuneytisins og með stuðningi Norrænu ráðherranefndarinnar. Yfirmenn stefnumála í varnarmálaráðuneytum skipuleggjendanna ræddu hvaða leiðir væru helst færar til að bregðast við breytingum á ógnarumhverfi svæðisins. Fulltrúar þýska og norska flotans, auk deildarstjóra aðgerðadeildar varnarmálaskrifstofu, fjölluðu um hvaða aðgerðir væru í gangi og hvernig ætti að koma pólitískum áherslum til framkvæmda. Loks voru fræðimenn í aðalhlutverki í umræðu um breytt umhverfi á norðurslóðum vegna loftlagsbreytinga og þeirra áhrifa sem búast mætti við á öryggisumhverfið á norðurslóðum. Málþingið var vel sótt og komust færri að en vildu.