Баянгол дүүрэгт 2026-2027 оны хичээлийн жилд 69 цэцэрлэг 18,260 хүүхэд төрийн болон төрийн өмчийн бус 57 сургуульд 65,525 хүүхэд суралцана

Баянгол дүүргийн Удирдах ажилтны шуурхай зөвлөгөөн өнөөдөр болж, дүүргийн Засаг дарга Ө.Сумъяабаатар удирдан явууллаа. Өнөөдрийн шуурхай зөвлөгөөнийг 2026-2027 оны хичээлийн шинэ жил маргааш эхлэх гэж буйтай холбогдуулан зохион байгуулсан бөгөөд зөвлөгөөнөөр дүүрэг дэх боловсролын салбарынхан болон энэ чиглэлээр үйл ажиллагаа явуулдаг ОНӨТҮГ-ын удирдлагууд хичээлийн шинэ жилийн бэлтгэл ажил буюу засвар үйлчилгээ, сургууль, цэцэрлэг орчмын аюулгүй байдал, мөн хүүхэд хөгжлийн чиглэлээр явуулах сургалт, нэмэлт хөтөлбөрүүдийн талаар дэлгэрэнгүй мэдээлэл өглөө. БАЯНГОЛ ДҮҮРЭГТ 2026-2027 ОНЫ ХИЧЭЭЛИЙН ЖИЛД:

1. Төрийн болон хувийн хэвшлийн нийт 69 цэцэрлэгт 12860 хүүхэд, төрийн болон төрийн өмчийн бус 57 сургуульд 65525 хүүхэд суралцана.
2. Энэ хичээлийн жил манай дүүрэгт төрийн өмчийн 350-р цэцэрлэг нэмэгдсэнээр орны тоо 150-иар, төрийн бус өмчийн 2 сургууль нэмэгдсэнээр суудлын тоо 500-гаар нэмэгдлээ.
3. Мөн энэ хичээлийн жилд манай дүүрэгт 3 хотхоны Бага сургууль байгуулагдаж байгаа бөгөөд Оюуны Ундраа сургуулийн 12 бүлгийн 432 суралцагч 88-р цэцэрлэгийн өргөтгөлийн байр, Эрдмийн өргөө сургуулийн 20 бүлгийн 540 суралцагч Нийгэм, сэтгэл судлалын сургуулийн байр, 73-р сургуулийн 8 бүлгийн 220 орчим суралцагч "Бяцхан монгол од" цэцэрлэгийн байранд тус тус хичээллэнэ.

Боловсролын салбар буюу цэцэрлэгт 655 үндсэн, 586 туслах багш, ЕБС-д нийт 3917 багш ажилтан ажиллахаас 2867 нь үндсэн багш байна. Боловсролын салбар дахь хөрөнгө оруулалт:

Хичээлийн шинэ жилийн бэлтгэл ажлыг хангах Шуурхай арга хэмжээний хүрээнд дүүргийн Засаг даргын нөөц хөрөнгөөс 2 сургууль, 15 цэцэрлэгийн дулаалга, сантехникийн их засвар болон бусад ажлыг хийж гүйцэтгэсэн. Мөн 2026 онд нийслэл болон дүүргийн ТХО-аар 2 сургууль, 8 цэцэрлэгийн сантехникийн их засвар, 1 цэцэрлэгийн фасад дулаалга, 3 цэцэрлэгт зөөлөн эдлэл, гал тогооны тоног төхөөрөмж, мөн 3 цэцэрлэгийн сүлжээний утас, шалны халаалт гадна тохижилтын ажлыг хийж бэлтгэл ажлыг хангалаа. Шуурхай зөвлөгөөний үеэр дүүргийн Засаг дарга Ө.Сумъяабаатар дараах үүрэг даалгаврыг өглөө. Үүнд:

1. Дүүргийн нийт удирдах ажилтнууддаа маргааш хичээлийн шинэ жил эхлэхтэй холбоотойгоор алба хаагчдадаа чөлөө олгох,
2. Гудамж талбайд хөл хөдөлгөөн болон замын хөдөлгөөний эрчим нэмэгддэг тул Цагдаагийн газар, Замын цагдаагийн хэлтэс Теле камерын хяналтын төв болон бусад мэргэжлийн байгууллагууд хамтарч ажиллах,
3. "Баянгол Боловсрол" хөтөлбөрийн хүрээнд 9, 10-р сард хийх ажлын төлөвлөгөөг танилцуулах,
4. "Баянгол цэцэрлэгт хүрээлэн"-гээс хүүхэд багачуудад зориулсан экологийн боловсрол олгох хөтөлбөрөө танилцуулах зэрэг үүрэг даалгаврыг өглөө.