Valgerður María tekur við embætti skrifstofustjóra á skrifstofu alþjóðamála

Dómsmálaráðherra hefur skipað Valgerði Maríu Sigurðardóttur í embætti skrifstofustjóra á skrifstofu alþjóðamála í dómsmálaráðuneytinu. Valgerður mun flytjast úr embætti varaformanns kærunefndar útlendingamála á grundvelli heimildar í lögum um réttindi og skyldur starfsmanna ríkisins. Hún tekur við embættinu 1. maí nk.

Valgerður lauk embættisprófi í lögfræði frá Háskóla Íslands árið 2008 og diplómu í afbrotafræði frá Háskóla Íslands árið 2015. Hún hefur frá árinu 2023 gegnt embætti varaformanns kærunefndar útlendingamála. Valgerður starfaði áður í dómsmálaráðuneytinu en hún hóf störf þar árið 2008 og starfaði sem lögfræðingur á skrifstofu almannaöryggis til ársins 2015. Á árunum 2015 til 2019 starfaði hún í sendiráði Íslands í Brussel sem sendiráðunautur dómsmálaráðuneytisins þar sem hún annaðist meðal annars hagsmunagæslu fyrir hönd Íslands gagnvart Evrópusambandinu á málefnasviðum dómsmálaráðuneytisins, einkum vegna Schengen-samstarfsins.

Frá árinu 2019 til ársins 2021 starfaði hún sem lögfræðingur á skrifstofu almanna- og réttaröryggis í dómsmálaráðuneytinu. Helstu verkefni hennar voru meðal annars gerð nýrra heildarlaga um Schengen-upplýsingakerfið á Íslandi. Frá árinu 2021 til ársins 2023 starfaði hún sem teymisstjóri útlendingamála á skrifstofu réttinda einstaklinga í dómsmálaráðuneytinu þar sem hún fór með yfirumsjón útlendingamála.

Skrifstofa alþjóðamála hefur umsjón með þeim málaflokkum í íslenskri stjórnsýslu er varða afbrotavarnir, landamæravörslu og málefni útlendinga. Skrifstofan sinnir stefnumótun á málefnasviðinu, hefur umsjón með löggjöf og vinnur að því að framkvæmd hennar sé í samræmi við lög og markmið ráðherra, með áherslu á skilvirkni og samræmda stjórnsýslu.

Jafnframt gegnir skrifstofan mikilvægu hlutverki í samskiptum við Alþingi, hagsmunaaðila og erlenda samstarfsaðila, og sinnir fjölbreyttum málaflokkum, svo sem baráttu gegn skipulagðri brotastarfsemi, peningaþvætti, netbrotum og hryðjuverkum, auk landamæravörslu, Schengen-samstarfs, ríkisborgararéttar, dvalarleyfa og alþjóðlegrar verndar.