STQARRIJA MILL-MINISTERU GĦAS-SAĦĦA U L-ANZJANITÀ ATTIVA L-Isptar Mater Dei jsaħħaħ is-servizzi ta’ Medical Imaging b’sistemi ġodda u avvanzati tal-ultrasound

​​

Il-Ministru għas-Saħħa u l-Anzjanità Attiva Jo Etienne Abela inawgura erba' sistemi ġodda tal-ultrasound fl-Isptar Mater Dei fid-Dipartiment tal-Medical Imaging li bihom ser ikunu jistgħu jingħataw trattament avvanzat lill-pazjenti.

Dawn l-iscanners ta' livell għoli jipprovdu immaġini ta' riżoluzzjoni avvanzata għall-evalwazzjoni tal-organi addominali, pelviċi, muskoloskeletali, vaskulari, tas-sider u tat-tessuti rotob, kif ukoll jipprovdu gwida preċiża għal proċeduri interventivi.

Il-Ministru Jo Etienne Abela spjega kif is-sistemi ta' dawn l-ultrasounds huma mgħammra b'teknoloġiji avvanzati, fosthom intelliġenza artifiċjali, elastografija shearwave għall-eżamijiet tal-fibrożi tal-fwied, u ultrasound bil-kuntrast, sabiex tittejjeb l-effiċjenza tal-ezamijiet, l-eżattezza dijanjostika kif ukoll l-ippjanar tal-kura. Qal, kif wieħed mill-iscanners se jkun ipprovdut lid-Dipartiment tal-Gastroenteroloġija, biex b'hekk ukoll se jiġi introdott servizz ġdid ta' ultrasound speċjalizzat għall-musrana ż-żgħira għall-ewwel darba.

"Dan l-investiment jirrifletti l-impenn tal-Gvern u tal-Ministeru tas-Saħħa u Anzjanità Attiva biex jiżgura li l-pazjenti f'Malta u Għawdex ikollhom aċċess għall-aktar teknoloġiji mediċi avvanzati u l-ogħla standards ta' kura. Flimkien mat-taħriġ u r-reklutaġġ kontinwu ta' radjologisti u radiographers, dan l-investiment se jgħin biex jitnaqqsu aktar il-listi ta' stennija għall-eżamijiet ta l-ultrasound u jissaħħaħ il-livell tas-servizzi offruti lill-pubbliku", temm jgħid Dr Abela.

Min-naħa tagħha Dr Martina Schembri Consultant Gastroenterologist, qalet kif "grazzi għal waħda minn dawk il-magni ser inkunu qed nibdew noffru servizz ta' Bowel Ultrasound. Dan isir permezz ta' ultrasound tal-musrana ż-żgħira u l-musrana l-kbira fejn ser tgħin biex ngħinu lil pazjenti fuq moniteraġġ ta' fjamazzjoni tal-murana u anke dwar trattamenti li qed jirċievi l-pazjent".​

​