Norðurlöndin efla samstarf á sviði fæðuöryggis og áfallaþols

Norðurlöndin hafa ákveðið að stíga mikilvæg skref til að styrkja sameiginlegt fæðuöryggi á tímum aukinnar óvissu í alþjóðamálum. Hanna Katrín Friðriksson, atvinnuvegaráðherra, sótti fund norrænu ráðherranefndarinnar í Færeyjum þann 10. júní sl. þar sem samstarfið var formgert af hálfu hlutaðeigandi ráðherra Norðurlandanna.

Samstarfinu er ætlað að tryggja öruggara matvælaframboð á Norðurlöndunum, meðal annars með því að tryggja þekkingarmiðlun og samræmingu milli landa. Samstarfið kemur í framhaldi af Karlstad-yfirlýsingunni frá árinu 2024 þar sem matvælaráðherrar Norðurlandanna samþykktu að styrkja samstarf ríkjanna um fæðuöryggi.

Fyrsta verkefnið í þessu nýja samstarfi felst í að gera þriggja ára vinnuáætlun með tilteknum samstarfssviðum. Markmiðið er að samstarfið verði síðan fastur hluti af norrænu samstarfi frá og með árinu 2028.