STQARRIJA MILL-MINISTERU GĦALL-ĠUSTIZZJA U R-RIFORMA TAS-SETTUR TAL-KOSTRUZZJONI 'L-Intelliġenza Artifiċjali u l-Kwistjoni tal-Imputabbiltà': It-Tielet Edizzjoni tal-ELSA Union[...]

Il-Ministeru għall-Ġustizzja u r-Riforma tas-Settur tal-Kostruzzjoni għal darba oħra reġa' ospita u appoġġja t-tielet edizzjoni tal-Union Debate organizzat mill-għaqda ELSA Malta, li sar taħt il-patroċinju tal-Professur Alexiei Dingli.

It-tema magħżula għal din is-sena kienet 'L-Intelliġenza Artifiċjali u l-Kwistjoni tal-Imputabbiltà'. Id-dibattitu pprovda pjattaforma li permezz tagħha l-istudenti u l-professjonisti ddiskutew dan is-suġġett kurrenti b'mod analitiku.

Il-Ministru għall-Ġustizzja u r-Riforma tas-Settur tal-Kostruzzjoni, Jonathan Attard stqarr li "Dan id-dibattitu huwa importanti sabiex inkomplu nidħlu fid-dettal ta' qasam li qiegħed jiżviluppa kuljum. Irridu nkunu għaqlin biżżejjed sabiex naraw li nilleġislaw fejn hemm il-ħtieġa, b'mod li nirriflettu l-ħtiġijiet attwali u futuri."

Il-pass mgħaġġel ta' kif qiegħda tavvanza t-teknoloġija, partikolarment is-sistemi ġenerattivi tal-Intelliġenza Artifiċjali, kapaċi jipproduċu midja sintetika realistika ħafna.

"Irridu wkoll inżommu quddiem għajnejna li fl-eventwalità ta' emendi leġislattivi, dawn m'għandhomx iservu bħala kastig għal min juża' t-teknoloġija. Anzi aħna rridu nirrikonoxxu l-importanza tal-Intelliġenza Artifiċjali fil-ħajja teknoloġika tal-lum. Madanakollu, nafu li sfortunatament bħal kull teknoloġija oħra, l-Intelliġenza Artifiċjali tista' wkoll tiġi użatha b'mod malizzjuż, u għalhekk irridu niżguraw ruħna li l-liġi tkopri dawn is-sitwazzjonijiet u tagħti il-protezzjoni legali meħtieġa fiċ-ċirkostanzi," sostna il-Ministru Attard.

Matul id-diskors tiegħu l-Ministru aċċenna għal żewġ reati ġodda li ġew introdotti fil-Kodiċi Kriminali; cyberstalking u cyberbullying, fejn stqarr li batu messaġġ ċar fid-dinja diġitali tal-lum. "Bl-istess determinazzjoni konvint li nistgħu nindirizzaw is-suġġett tad-deepfake," sostna l-Ministru.

Il-Ministru Attard irringrazzja lill-Għaqda ELSA li ħadmet b'tant passjoni fl-organizzazzjoni ta' din l-attività, kif ukoll tal-ħidma kontinwa tagħha viċin l-istudenti tal-liġi.

Numru sabiħ ta' studenti attendew għal din l-attività, li minn sena għal sena dejjem qiegħda iżżid fil-konkorrenza. Il-Ministru Attard ħeġġeġ l-istudenti jkomplu jimirħu fl-istudji tagħhom, fil-ħsieb kritiku, u fil-parteċipazzjoni tagħhom f'għaqdiet li jwasslu leħen fis-soċjetà Maltija, inkluż l-ELSA.

Il-Ministru sellem lill-professjonisti kollha li għoġobhom ikunu parti minn din l-inizjattiva u faħħar is-sinerġija akkademika.

Fid-dibattitu pparteċipaw Dr Charles Mercieca, ⁠Dr Ian Gauci, Francesco Formosa, Emma Bugeja, Timmy Desira u Maya Briffa.

​