Zëvendësministrja Megi Fino merr pjesë në Takimin e Ministrave të Jashtëm të Nismës së Evropës Qendrore (CEI)

Zëvendësministrja për Evropën dhe Punët e Jashtme, znj. Megi Fino, mori pjesë sot në Takimin e Ministrave të Jashtëm të Nismës së Evropës Qendrore (CEI).

Në fjalën e saj, znj. Fino vlerësoi Presidencën rumune, si dhe Ministrinë e Punëve të Jashtme dhe të Bashkëpunimit Ndërkombëtar të Italisë për organizimin e konferencës me rastin e 30-vjetorit të themelimit të CEI-t.

Zëvendësministrja theksoi rolin e rëndësishëm të CEI-t në forcimin e bashkëpunimit rajonal dhe në avancimin e procesit të integrimit evropian, duke nënvizuar se përshpejtimi i integrimit të vendeve të Ballkanit Perëndimor është thelbësor për të ardhmen e përbashkët evropiane.

Në vijim, znj. Fino rikonfirmoi qëndrimin e palëkundur të Shqipërisë ndaj agresionit të pajustifikuar të Federatës Ruse kundër Ukrainës, duke shprehur mbështetjen e plotë për përpjekjet e CEI-t në ndihmë të popullit ukrainas, si dhe angazhimin e vendit tonë për të kontribuar më tej në Fondin e Bashkëpunimit të CEI-t.

Duke u ndalur në bashkëpunimin rajonal, Zëvendësministrja theksoi rëndësinë e një qasjeje gjithëpërfshirëse, duke nënvizuar se ky bashkëpunim nuk mund dhe nuk duhet të zëvendësojë procesin e anëtarësimit në Bashkimin Evropian. Në këtë kontekst, ajo evidentoi rolin kyç të nismave si Procesi i Berlinit, Plani i Tregut të Përbashkët Rajonal 2025-2028 dhe Plani i Rritjes për Ballkanin Perëndimor, të cilat kontribuojnë drejtpërdrejt në zhvillimin ekonomik të rajonit dhe në afrimin me tregun e vetëm evropian.

Në përmbyllje, znj. Fino theksoi progresin e rëndësishëm të Shqipërisë në procesin e negociatave për anëtarësim në Bashkimin Evropian, duke vënë në dukje hapjen e të gjithë kapitujve dhe përfitimin e disbursimeve të para në kuadër të Planit të Rritjes. Shqipëria mbetet e përkushtuar për përfundimin e negociatave teknike brenda vitit 2027 dhe për anëtarësimin e plotë në Bashkimin Evropian deri në vitin 2030, bazuar në parimin e meritës dhe në zbatimin e qëndrueshëm të reformave.