Prémiu Empreendedor Feto Datoluk Loke Ona Nomeasaun atu Fó Onra ba Empreza Sira Liderádu husi Feto Pioneira sira iha Timor-Leste

Dili, Timor-Leste, 4 Maiu 2026 - Feto emprezária sira ne'ebé kria daudaun empregu sira, transforma indústria, no inspira jerasaun lider negósiu sira tuir mai iha Timor-Leste dala ida tan sei sai sentru atensaun, bainhira loke nomeasaun sira ohin ba edisaun datoluk Prémiu Emprendedor Feto Timor-Leste nian, ne'ebé organiza ho patrosíniu husi J. Ramos-Horta, Prezidente Repúblika Demokrátika Timor-Leste.

Organiza husi International Finance Corporation (IFC) - parte setór privadu Grupo Banku Mundial nian, no Associação Empresarial das Mulheres de Timor-Leste (AEMTL), prémiu sira ne'e lansa nudar parte husi IFC ninia Programa Abilidade Setór Finanseiru Timor-Leste. Implementa iha parseria ho Banco Central de Timor-Leste (BCTL) no hetan apoiu husi Governu Australia no Nova Zelândia, programa ne'e iha objetivu atu promove inkluzaun finanseiru ne'ebé luan-liu tan liuhosi dezenvolve setór finanseiru ho inisiativa abilidade espesífiku sira.

"Progresu Timor-Leste depende ba partisipasaun kompletu no igual husi nia povu tomak - no feto sira mak iha sentru husi viajen ne'e," dehan Prezidente Timor-Leste J. Ramos-Horta, ne'ebé simu mos Prémiu Nobel da Paz. "Husi merkadu Dili to'o munisípal sira iha nasaun laran tomak, feto Timoroan sira kria negósiu, hamosu servisu, no lori inovasaun ne'ebé haforsa ita nia ekonomia no eleva ita nia komunidade sira. Selebrasaun Prémiu Empreendedor Feto Timor-Leste ne'e ba espíritu ida ne'e duni - rekoñese katak empreendedora sira no líderes profisionais feto sira nian merese atu haree, fo honra, no enkoraja atu atinje nivel aas liu tan. Ho laran tomak hau enkoraja feto hotuhotu ne'ebé ho brani lidera, inova, no kontribui ba futuru nasaun ne'e nian, atu hakat mai no aplika ba Prémiu Feto Timor-Leste iha Negósiu. Ita-boot nia istória merese atu fó-sai, no Timor-Leste orgullu ho ita-boot."

Ho baze iha susesu eventu inaugurál tinan anterior nian - ne'ebé simu nomeasaun to'o 100 - Prémiu tinan ne'e kontinua selebra atinjimentu sira feto no organizasaun nian ne'ebé impulsiona progresu iha setór sira hahú husi retallu no agrikultura ba ospitalidade no finansas, iha nasaun ne'ebé ho ekonomia joven liu iha Sudeste Aziátiku. Vensedór barak tinan anterior nian alkansa ona kresimentu profesionál boot liu, vizibilidade, no espansaun emprezariál - hodi hametin liu tan sira-nia papél iha kriasaun empregu no iha espansaun oportunidade sira.

"Bainhira feto Timor-oan sira harii sira nia negósiu, sira forma futuru nasaun nian - guia husi korajen, vizaun, no reziliénsia ne'ebé la nakadoko," dehan Hergui Luina Fernandes Alves, Prezidente AEMTL. "Prémiu Empreenderora Feto Timor-Leste nian mak plataforma signifikativu atu onra exelénsia, inspira mudansa, no selebra prestasaun esepsionál feto sira nian iha negósiu - hodi promove unidade, reforsa kadeia valor, no lidera kriasaun servisu iha nasaun tomak."

Empreendedora feto sira halo papel importante liu-liu iha dezenvolvimentu ekonómiku Timor-Leste nian, liuhusi kresimentu empreza mikro, ki'ik, no médiu sira ne'ebé kria servisu no apoia komunidade sira. Premiu Empreendedora Feto destaka kontribuisaun sira ne'e hodi promove visibilidade no oportunidade boot liu ba empreza sira ne'ebé lidera husi feto.

"Empreendedora feto sira iha Timor-Leste harii negósiu ho determinasaun ne'ebé notável, maibé barak sei hasoru bareira ba finansiamentu, ne'ebé dala barak aumenta tanba asesu limitadu ba informasaun negósiu no finanseira ne'ebé limitadu no ligasaun ba instituisaun finanseira sira," dehan Christina Ongoma, Jerente Rejionál IFC nian ba FIG Advisory/Upstream, East Asia and the Pacific. "Hodi selebra sira nia susesu no hametin asesu ba koñesimentu no rede sira, Prémiu Empreendedora Feto bele ajuda empreza sira ne'ebé feto sira maka na'in -atu buras, kria empregu sira, no kontribui ba ekonomia ida ne'ebé inkluzivu liu."

Selebra impaktu ne'ebé aumenta husi empreendedora feto sira ba ekonomia Timor-Leste nian, Prémiu Empreendedora Feto destaka oinsá empreza sira ne'ebé lidera husi feto forma kresimentu inklusivu no dezenvolvimentu nasionál.

"Desde tinan 2024 Prémiu Empreendedora Feto rekoñese talentu no realizasaun husi empreendedora feto sira iha Timor-Leste," dehan David Freedman, Reprezentante Grupu Banku Mundial ba Timor-Leste. "Grupu Banku Mundial urgullu atu apoia programa ida ne'e. Tuir peskija nasionál MSME nian foin lalais ne'e, feto sira lidera liu metade husi empreza tomak mikro, ki'ik, no médiu iha Timor-Leste, ne'e halo negósiu sira ne'ebé lidera husi feto sai forsa ne'ebé vital no buras iha dezenvolvimentu nasaun nian."

Prémiu Empreendedora Feto Timor-Leste 2026, aprezenta prémiu sanulu ho kategoria lima, ne'ebé selebra eselénsia iha emprendedorizmu no lideransa ne'ebé feto sira lidera. Prémiu ne'e sei rekoñese empreza hirak ne'ebé hahu ho estraordináriu ne'ebé feto sira lidera, empreza sira ne'ebé estabelese ona, lider korporativu sira, no inisiativa sira ne'ebé promove inkluzaun finanseira feto sira nian no apoia kresimentu empreza sira ne'ebé feto sira lidera. Ho inskrisaun nakloke ba área munisipál hotu-hotu, programa ne'e enkoraja nomeasaun oin-oin no inkluzivu.

Nomeasaun loke to'o 8 Jullu 2026. Individu, instituisaun, ONGs, no empreza sira ne'ebé baze iha Timor-Leste iha direitu atu kandidata a'an. Kandidatura sira tenke inklui esplikasaun klaru ida kona-ba kandidatu ninia susesu no impaktu sira. Atu hetan tan informasaun ka haruka nomeasaun ida, vizita: https://aemtl.org/women-in-business-awards/