STQARRIJA MILL-UFFIĊĊJU TAD-DEPUTAT PRIM MINISTRU U L-MINISTERU GĦALL-AFFARIJIET BARRANIN U T-TURIŻMU “It-tfal qatt ma għandhom jintużaw bħala strument tal-gwerra” – Id-Deputat[...]

Id-Deputat Prim Ministru u Ministru għall-Affarijiet Barranin u t-Turiżmu, Dr Ian Borg, enfasizza l-impenn sod ta' Malta favur il-paċi, ir-responsabbiltà u l-protezzjoni tat-tfal fil-kunflitti armati waqt sensiela ta' impenji ta' livell għoli fl-Assemblea Ġenerali tan-Nazzjonijiet Uniti ġewwa New York.

Il-protezzjoni tat-tfal f'żoni ta' kunflitt kienet fuq quddiem tal-prijoritajiet ta' Malta. Id-Deputat Prim Ministru Borg ħa sehem fil-'High-Level Meeting on Restoring Childhood and Humanity - Advancing Peace in Ukraine Through the Return of Ukrainian Children', ppreseduta mill-Prim Ministru tal-Kanada, Mark Carney, u l-President tal-Ukrajna, Volodymyr Zelenskyy. Laqgħa li kellha l-għan li ssaħħaħ l-isforzi għar-ritorn tat-tfal Ukreni li ġew deportati illegalment mill-Federazzjoni Russa.

Fl-indirizz tiegħu, Dr Borg saħaq li "L-aħjar interessi tat-tfal għandhom jiggwidaw l-azzjonijiet kollha tagħna. Hu essenzjali li tiġi żgurata r-responsabbiltà ta' dawk responsabbli, u li l-ritorn ta' dawn it-tfal ikun parti integrali mill-kisba ta' paċi ġusta u dejjiema. Malta ser tkompli tappoġġja lill-Ukrajna f'dawn l-isforzi sabiex kull tifel u tifla jkunu jistgħu jerġgħu jingħaqdu mal-familja tagħhom, jirkupraw l-identità tagħhom, u jgħixu b'dinjità u sigurtà. Din hija r-responsabbiltà komuni tagħna, u l-impenn kollettiv tagħna għall-futur."

Fid-dawl tal-eskalazzjonijiet riċenti, Dr Borg ingħaqad ukoll mal-istqarrija tal-Kunsill tas-Sigurta tan-Nazzjonijiet Uniti dwar l-aggressjoni tar-Russja kontra l-Ukrajna, fejn tenna b'mod ċar il-pożizzjoni ta' Malta, dik li l-fruntieri qatt ma għandhom jinbidlu bil-forza u li l-paċi trid tkun ġusta, dejjiema, u mibnija fuq il-liġijiet internazzjonali. Malta pparteċipat ukoll fil-laqgħa ta' livell għoli sabiex tiġi żgurata l-akkontabilità fl-Ukrajna.

Waqt l-idirizz tiegħu fil-'High-Level Event Humanitarian Diplomacy in Action: Collective Response to the Crises in the Middle East', Dr Borg tenna t-tħassib ta' Malta dwar is-sitwazzjoni umanitarja devastanti f'Gaza, is-Sirja, il-Jemen u l-Libanu. Huwa qabel mas-sejħa tas-Segretarju Ġenerali għall-waqfien mill-ġlied immedjat u bla kundizzjoni, kif ukoll għall-aċċess umanitarju bla xkiel, dan filwaqt li nnota li aktar minn 5,000 tifel u tifla f'Gaza qed isofru mill-malnutrizzjoni. "Il-ġuħ qatt m'għandu jintlaqa' mit-tiri", iddikjara, kif ukoll enfasizza l-ħtieġa urġenti għal djalogu umanitarju serju u effettiv.

Dan kollu jibni fuq l-ħidma ta' Malta, kemm matul il-presidenza tal-OSCE, t-tmexxija tal-Kunsill tas-Sigurtà, u issa bħala President tal-Kunsill tal-Ewropa. Iktar kmieni din is-sena, Malta kellha wkoll rwol ċentrali fil-ħolqien tat-Tribunal Speċjali għall-Kriminalità tal-Aggressjoni kontra l-Ukrajna, fl-istess waqt li pajjiżna kompla jqajjem kuxjenza fejn jidħlu t-tfal u l-kunflitti armati. Malta kompliet tisħaq ukoll fuq il-prinċipju li t-tfal qatt m'għandhom jintużaw bħala strumenti tal-gwerra u li l-protezzjoni tagħhom għandha tibqa' fil-qalba tal-aġenda internazzjonali.

"Matul dawn l-impenji fil-marġini tal-UNGA, komplejna nibnu fuq ix-xogħol li qed nagħmlu matul il-Presidenza ta' Malta tal-Kunsill tal-Ewropa u lil hinn. Organizzajna u ħadna sehem f'numru ta' inizjattivi, inkluż fl-ambaxxata tagħna, ħafna minnhom iffokaw fuq tema important għalina, dik tal-protezzjoni tat-tfal fil-kunflitti armati. B'dan il-mod, qed insaħħu dak li bdejna waqt it-tmexxija tagħna tal-Kunsill tas-Sigurtà tan-Nazzjonijiet Uniti, u qed niżguraw li din il-ħidma tibqa' parti ċentrali mill-aġenda internazzjonali fejn tidħol il-paċi u s-sigurtà."

Matul dawn il-jiem, id-Deputat Prim Ministru kellu wkoll sensiela ta' laqgħat oħra fosthom laqgħa li ġabet flimkien Ministri mill-UE u dawk mill-Amerka Latina u l-Karibew, laqgħa Ministerjali Troika tal-OSCE kif ukoll numru ta' laqgħat bilaterali. Flimkien mal-Ministru tal-Affarjiet Barranin tal-Andorra, Imma Tor Faus, ġie ffirmat ukoll ftehim ġdid għall-working holiday visas li ser jespandi l-opportunitajiet għaż-żgħażagħ kif ukoll ikompli jsaħħaħ il-kollaborazzjoni bejn iż-żewġ pajjiżi.

Dr Borg ħa sehem ukoll fl-Ikla Transatlantika, ospitata mis-Segretarju tal-Istat Amerikan Marco Rubio, fejn ikkonferma mill-ġdid l-impenn ta' Malta biex tissaħħaħ ir-relazzjoni transatlantika u jiġu promossi l-valuri komuni.

​​