Grischun: Dar giu gratuitamain armas e muniziun

Sonda, ils 15 da november 2025, organisescha la Polizia chantunala dal Grischun per la sisavla giada in'acziun da collectar armas. En general pon ins dar giu armas e muniziun da tut temp a la Polizia chantunala dal Grischun.

La Polizia chantunala dal Grischun prenda encunter armas e muniziun ils 15 da november en tut las basas da la polizia sco er tar il Commando da polizia a la Ringstrasse 2 a Cuira. Las uras d'avertura èn da las 08.00 fin las 12.00 e da las 13.30 fin las 17.00. Possessuras e possessurs d'armas ston suttascriver ina decleraziun da renunzia al lieu. Tut las armas e la muniziun vegnan silsuenter dismessas en moda professiunala tras il Post spezialisà per armas.

Repetiziun mintga 3 onns
Da princip èsi da tut temp pussaivel da dar giu armas e muniziun a la Polizia chantunala dal Grischun. Cun las acziuns da collectar armas, che vegnan realisadas mintga 3 onns, duain las burgaisas ed ils burgais vegnir rendids attents sistematicamain a questa pussaivladad. La Lescha d'armas oblighescha ils chantuns da prender encunter gratuitamain armas e muniziun or da possess privat. Avant 3 onns èn vegnidas dadas giu 139 armas.