STQARRIJA MILL-MINISTERU GĦAT-TRASPORT, L-INFRASTRUTTURA U X-XOGĦLIJIET PUBBLIĊI Estiża l-inizjattiva ta’ carpooling għall-istudenti universitarji b’50 parkeġġ ġdid ġewwa[...]

Minn nhar it-Tnejn, 6 ta' Ottubru, 50 post ġdid ta' parkeġġ ser ikunu riservati għall-istudenti li jagħżlu li jivvjaġġaw flimkien ma' studenti oħra lejn l-Università, wara li ntlaħaq ftehim bejn il-Ministeru għat-Trasport, l-Infrastruttura u x-Xogħlijiet Pubbliċi u l-amministrazzjoni ta' Campus Hub. Dan filwaqt li l-Ministeru jinsab ukoll f'fażi avvanzata ta' taħditiet mal-Kunsill Studenti Universitarji (KSU) biex jiġu offruti iktar postijiet għal-carpooling fil-parkeġġi ta' madwar il-kampus, wara s-suċċess u d-domanda għolja li rat din l-inizjattiva fis-snin li għaddew.

Waqt żjara fil-Freshers' Week ġewwa l-Università ta' Malta, il-Ministru għat-Trasport, l-Infrastruttura u x-Xogħlijiet Pubbliċi Chris Bonett qal li din l-inizjattiva flimkien ma' oħrajn mill-pjan Reshaping Our Mobility qed ikomplu jippromwovu l-użu ta' mezzi ta' trasport alternattivi u aktar sostenibbli fost iż-żgħażagħ. "Qed noffru soluzzjonijiet konkreti u effettivi lill-istudenti. Din l-inizjattiva mhux biss tnaqqas n-numru ta' karozzi fit-toroq tagħna, iżda tħeġġeġ ukoll liż-żgħażagħ biex jibdew iħarsu lejn il-mobilità b'mod aktar sostenibbli". Huwa spjega kif minbarra din l-inizjattiva, matul din il-ġimgħa ġiet offruta Tallinja Card b'xejn lill-istudenti biex tħeġġiġhom jużaw dan il-mezz ta' trasport bla ħlas, filwaqt li beda servizz ġdid u dirett ta' Park & Ride minn Ta' Qali lejn l-Università.

Min-naħa tiegħu, Jan Proschek, Viċi President għall-Affarijiet Interni tal-Kunsill Studenti Universitarji (KSU), qal li, "L-inizjattiva tal-Carpooling bdiet mill-KSU iktar minn 10 snin ilu, bil-għan li ninkoraġġixxu trasport sostenibbli. Din is-sena, flimkien mal-Ministeru għat-Trasport, l-ammont ta' spazji dedikati għal carpooling ser jiżdiedu b'mod drastiku hekk kif id-diskussjonijiet matul l-aħħar xhur bejn il-Ministeru u l-KSU wasslu għal qbil biex din l-inizjattiva ġiet estiża." L-istudenti jistgħu jibbukkjaw il-parkeġġ tagħhom ħamest'ijiem bil-quddiem permezz tal-mobile app myKSU, b'mod sempliċi u effiċjenti.

​​