STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦALL-AFFARIJIET BARRANIN U T-TURIŻMU: Ftehim ġdid sabiex tiġi meqjusa l-possibbiltà li l-Università La Sapienza[...]

Il-ftehim isegwi diskussjonijiet tal-Università mad-Deputat Prim Ministru Borg is-sena li għaddiet

Il-Gvern Malti u UnitelmaSapienza, l-università online fi ħdan l-università prestiġjuża La Sapienza f'Ruma, iffirmaw ftehim biex jistabbilixxu qafas strutturat għal kooperazzjoni bejniethom f'Malta.

Il-ftehim kien iffirmat mir-Rettur ta' UnitelmaSapienza, il-Professur Bruno Botta, u mill-Ambaxxatur ta' Malta għall-Italja, Daniel Azzopardi, f'Ruma din il-ġimgħa, fil-preżenza tad-Deputat Prim Ministru u Ministru għall-Affarijiet Barranin u t-Turiżmu, Ian Borg, u uffiċjali oħrajn.

Dan il-ftehim isegwi ż-żjara produttiva li kellu l-Professur Botta f'Malta s-sena li għaddiet, u l-laqgħa tiegħu mad-Deputat Prim Ministru Borg fil-Belt Valletta. Il-ftehim jistabbilixxi pjan ta' ħidma strutturat biex tiġi mistħarrġa l-possibbiltà li La Sapienza jkollha preżenza f'Malta, kif ukoll sabiex tipprovdi servizzi akkademiċi u professjonali f'setturi rilevanti għall-ekonomija Maltija, kif ukoll kooperazzjoni fl-edukazzjoni u t-taħriġ, inklużi f'oqsma t'interess għad-diplomatiċi Maltin u uffiċjali pubbliċi.

Id-Deputat Prim Ministru Borg faħħar lil UnitelmaSapienza u lill-awtoritajiet Maltin, inkluż EducationMalta, il-Ministeru għall-Affarijiet Barranin u t-Turiżmu u l-Ambaxxata ta' Malta f'Ruma, talli fi żmien qasir komplew jaħdmu fuq dak li kien diskuss is-sena li għaddiet, sabiex jikkonkludu dan il-ftehim u jiftħu t-triq għal kollaborazzjonijiet ġodda u promettenti.

"Dan il-ftehim se jsaħħaħ l-iżvilupp tal-akkademiċi u tal-istudenti fil-pajjiżi tagħna u lil hinn minnhom. Se nkomplu nappoġġjaw liż-żewġ naħat, filwaqt li nħeġġukom tużaw il-potenzjal u l-ħiliet rispettivi tagħkom sabiex inwettqu dan il-ftehim bil-għaqal. Edukazzjoni ta' kwalità hija l-aktar triq effettiva lejn l-ugwaljanza, ir-reżiljenza u l-prosperità. Irridu li toħolqu opportunitajiet tanġibbli ta' valur miżjud li jistgħu jappoġġjaw il-progress tagħna fl-edukazzjoni u f'ħafna aspetti oħra soċjoekonomiċi," sostna d-Deputat Prim Ministru Borg.

Il-Professur Botta nnota li dan il-ftehim jirrifletti impenn komuni lejn it-tisħiħ tar-rabtiet akkademiċi u istituzzjonali bejn Malta u l-Italja. "Il-kollaborazzjoni tagħna llum hija pass importanti lejn kooperazzjoni aktar b'saħħitha, aktar tanġibbli, u aktar strutturata bejn UnitelmaSapienza u Malta. Nemmnuh bis-sħiħ fil-valur tad-djalogu akkademiku internazzjonali u fl-iskambju tal-għarfien sabiex jixprunaw l-iżvilupp taż-żewġ naħat," hu qal.

L-Ambaxxatur Azzopardi ukoll irringrazzja lil Education Malta, lill-Ministeru u lil UnitelmaSapienza għal dan il-ftehim importanti. "Dan se jippermettilna niffokaw fuq oqsma speċifiċi ta' kooperazzjoni, bl-għan aħħari li nibnu rabtiet aktar mill-qrib ma' UnitelmaSapienza, bħala l-fergħa diġitali ta' waħda mill-aktar universitajiet prominenti fl-Ewropa, Sapienza. Dan l-isforz se jkompli jressaq aktar qrib lil Malta u lill-Italja," spjega l-Ambaxxatur.

Id-Direttur Ġenerali ta' UnitelmaSapienza, Mauro Giustozzi, il-Viċi Retturi Rosella Castellano u Pier Luigi Petrillo, u l-Kap tal-Uffiċċju tal-Internazzjonalizzazzjoni, Maria Grazia Semilia, kienu wkoll preżenti waqt l-iffirmar tal-ftehim.

Ritratt: MFT

​