Ministry of Foreign Affairs of the Republic of Armenia
Ministry of Foreign Affairs of the Republic of Armenia
06/02/2026 | Press release | Archived content
ՀՀ ԱԳ նախարարի տեղակալը մասնակցել է «Դեպի ավելի ներառական բազմակողմ համագործակցություն․ ֆեմինիստական դիվանագիտության առաջարկներ» պանելային քննարկմանը
ՀՀ ԱԳ նախարարի տեղակալը մասնակցել է «Դեպի ավելի ներառական բազմակողմ համագործակցություն․ ֆեմինիստական դիվանագիտության առաջարկներ» պանելային քննարկմանը
02 հունիսի, 2026Հունիսի 2-ին Մադրիդում՝ Ֆեմինիստական դիվանագիտության 5-րդ նախարարական համաժողովի շրջանակներում, ՀՀ ԱԳ նախարարի տեղակալ Ռոբերտ Աբիսողոմոնյանը մասնակցել և ելույթով հանդես է եկել «Դեպի ավելի ներառական բազմակողմ համագործակցություն․ ֆեմինիստական դիվանագիտության առաջարկներ» խորագրով պանելային քննարկմանը։
Պանելային քննարկման վարողի հարցադրման համատեքստում ՀՀ ԱԳ նախարարի տեղակալն անդրադարձել է բազմակողմ հարթակներում կանխարգելման և մարդու իրավունքների պաշտպանություն ոլորտներում Հայաստանի կողմից գործադրվող ջանքերին, «Կանայք, խաղաղություն և անվտանգություն» օրակարգի և կանխարգելման կապին, ինչպես նաև նշյալ հարցերում կանանց դերակատարության բարձրացմանը:
Իր խոսքում ՀՀ ԱԳ նախարարի տեղակալը նշել է, որ կանխարգելման օրակարգը ՀՀ արտաքին քաղաքականության առաջնահերթություններից է, և Հայաստանը շարունակական ջանքեր է գործադրում կանխարգելման օրակարգի ամրապնդման ուղղությամբ, այդ թվում՝ «ՄԱԿ80» նախաձեռնության շրջանակներում ՄԱԿ համակարգում ընթացող բարեփոխումների համատեքստում։
Ռոբերտ Աբիսողոմոնյանը շեշտել է, որ մարդու իրավունքների խախտումների կանխարգելումը մեծ դեր է խաղում ՄԱԿ-ի մյուս հենասյուների՝ անվտանգության և զարգացման ոլորտներում առաջընթացի կամ ձախողման համար: Այս առումով կարևորվել է բոլոր երեք հենասյուների միջև համագործակցությունը և փոխկապակցվածության ամրապնդման ուղղությամբ գործնական քայլեր ձեռնարկելու անհրաժեշտությունը։ Որպես Հայաստանի ներդրում այս ոլորտում ներկայացվել է ՄԱԿ Մարդու իրավունքների խորհրդում Հայաստանի կողմից հեղինակած «Ցեղասպանության կանխարգելում» երկամյա բանաձևը, որը հստակ կոչ է անում ընդգրկել կանխարգելման օրակարգը ՄԱԿ բոլոր երեք հիմնասյուներում:
Անդրադառնալով «Կանայք, խաղաղություն և անվտանգություն» օրակարգին՝ ՀՀ ԱԳ նախարարի տեղակալը նշել է, որ քննարկումները հաճախ կենտրոնանում են կանանց պաշտպանության հարցերի վրա, մինչդեռ օրակարգը հավասարապես վերաբերում է կանանց մասնակցությանը, կանխարգելմանը և խաղաղաշինությանը։ Ընդգծել է, որ կանայք ոչ միայն պաշտպանության շահառուներ են, այլև դերակատարներ, առաջնորդներ, միջնորդներ և խաղաղարարներ, որոնց իմաստալից մասնակցությունը նպաստում է առավել ներառական որոշումների կայացմանը, համայնքների դիմակայունության ամրապնդմանը և երկարատև խաղաղության հաստատմանը։
ԱԳ նախարարի տեղակալը նշել է նաև, որ Հայաստանը հատուկ ուշադրություն է դարձնում հակամարտությունների կանխարգելման և վաղ նախազգուշացման մեխանիզմներում կանանց դերի ամրապնդմանը:
Ամփոփելով՝ ՀՀ ԱԳ նախարարի տեղակալը շեշտել է, որ ֆեմինիստական մոտեցումը խաղաղությանը և անվտանգությանը ոչ այնքան կանանց և աղջիկների պաշտպանությունն է բռնությունից, այլ նրանց մասնակցությունն է բռնության կանխարգելմանը։
Պանելային քննարկմանը մասնակցել են նաև Թաիլանդի ԱԳ նախարարի տեղակալ Վիժավատ Իսարաբակդին, Ռուանդայի ԱԳ նապարարի տեղակալ Ուստա Կաիտեսին, Իսպանիայի ԱԳ նախարարության՝ ՄԱԿ-ի, միջազգային կազմակերպությունների և մարդու իրավունքների հարցերով գլխավոր տնօրեն Լուսիա Գարցիա Ռիկոն, ՄԱԿ Կանայք կազմակերպության՝ քաղաքականության, խրագրերի և միջկառավարական բաժնի ղեկավար Սառա Հենդրիկսը, ՄԱԿ հիմնադրամի՝ կանանց և աղջիկների ռազմավարության հարցերով փոխնախագահ Միշել Միլֆորդ Մորսը, «GWL Voices» կազմակերպության տնօրեն Սուսանա Մալկորան և «The Alliance for Diplomacy and Justice» նախաձեռնության համանահիմնադիր և համանախագահ Ջեսիկա Ստերնը՝ որպես մոդերատոր:
Ministry of Foreign Affairs of the Republic of Armenia published this content on June 02, 2026, and is solely responsible for the information contained herein. Distributed via Public Technologies (PUBT), unedited and unaltered, on June 04, 2026 at 10:36 UTC. If you believe the information included in the content is inaccurate or outdated and requires editing or removal, please contact us at [email protected]