Ministry for the Economy, Enterprise and Strategic Projects of the Republic of Malta
Ministry for the Economy, Enterprise and Strategic Projects of the Republic of Malta
11/02/2025 | Press release | Distributed by Public on 11/03/2025 06:55
STQARRIJA MILL-GVERN TA’ MALTA L-interessi ta’ Malta jipprevalu fil-proċeduri ta’ arbitraġġ internazzjonali kontra Steward Healthcare
- Il-Gvern jirnexxi fid-difiża tiegħu u l-pożizzjoni ewlenija tiegħu tiġi kkonfermata mill-Kamra Internazzjonali tal-Kummerċ
Il-Gvern ta' Malta tard dalgħodu rċieva kopja tas-sentenza maħruġa mit-tribunal ta' arbitraġġ fir-rigward tal-proċeduri ta' arbitraġġ internazzjonali li jinvolvu lil Steward Healthcare, deċiża taħt ir-Regoli tal-Kamra Internazzjonali tal-Kummerċ (ICC).
It-tribunal laqa' d-difiża prinċipali tal-Gvern u ċaħad it-talba kuntrattwali ta' Steward Healthcare li kienet ta' madwar €148 miljun.
It-tribunal ta' arbitraġġ ċaħad it-talbiet ta' Steward u applika l-prinċipji tar-restituzzjoni skont il-Liġi Maltija. Ma ngħatawx danni lil ebda waħda mill-partijiet. It-tribunal rrikonoxxa li Malta rċeviet valur ġust għas-servizzi mwettqa minn Steward u għall-ħlasijiet li saru mill-Gvern ta' Malta taħt il-konċessjoni.
Skont is-sentenza tal-ICC, il-benefiċċji totali li rċieva l-Gvern ta' Malta jammontaw għal €889,434,091, filwaqt li dawk li rċeviet Steward Healthcare jammontaw għal €884,644,629, b'differenza ta' €4.78 miljun li huma dovuti lil Steward Healthcare.
It-tribunal tal-ICC ċaħad ukoll it-talba ta' Steward li l-Gvern ta' Malta temm il-konċessjoni b'mod illegali jew li kien dovuti kumpens kuntrattwali.
Il-Gvern ta' Malta se jkompli jevalwa d-deċiżjoni sħiħa flimkien mal-Avukat tal-Istat u l-konsulenti legali tiegħu sabiex jikkunsidra l-implikazzjonijiet legali tas-sentenza.
Ir-riżultat ta' dawn il-proċeduri ta' arbitraġġ jikkonferma l-pożizzjoni tal-Gvern biex jipproteġi l-interess nazzjonali u jiżgura li r-riżorsi pubbliċi jibqgħu jiġu amministrati fl-aħjar interess taċ-ċittadini Maltin.
Il-Gvern ta' Malta jirringrazzja lill-impjegati pubbliċi u lill-konsulenti legali li taw is-sehem tagħhom biex isalvagwardjaw l-interess pubbliku f'dan il-każ.
Aktar informazzjoni tingħata hekk kif it-tim legali tal-Gvern itemm l-analiżi tiegħu tal-konklużjonijiet dettaljati tat-tribunal.
Ministry for the Economy, Enterprise and Strategic Projects of the Republic of Malta published this content on November 02, 2025, and is solely responsible for the information contained herein. Distributed via Public Technologies (PUBT), unedited and unaltered, on November 03, 2025 at 12:55 UTC. If you believe the information included in the content is inaccurate or outdated and requires editing or removal, please contact us at [email protected]