Utanríkisráðherra Spánar sótti Ísland heim

Tvíhliða samband Íslands og Spánar, Evrópumál, norðurslóðir, innrásarstríð Rússlands í Úkraínu, staða mála í Mið-Austurlöndum og samskipti yfir Atlantsála voru efst á baugi fundar Þorgerðar Katrínar Gunnarsdóttur utanríkisráðherra og José Manuel Albares Bueno, utanríkisráðherra Spánar, sem fram fór í Ráðherrabústaðnum við Tjarnargötu í dag.

Alþjóðasamstarf og málefni Sameinuðu þjóðanna voru einnig til umræðu og þá var skrifað undir viljayfirlýsingar um reglulegt pólitískt samráð ríkjanna, frekara samstarf á sviði jafnréttismála sem og á sviði rannsókna og vísinda. Þá greindi Albares Þorgerði Katrínu frá þeim ásetningi spænskra stjórnvalda að opna sem fyrst sendiráð á Íslandi.

"Samband okkar við Spán er sífellt að styrkjast enda mikil og góð samskipti milli ríkjanna. Ekki aðeins á sviði stjórnmála og viðskipta heldur einnig venjulegs fólks, en þúsundir Íslendinga sækja Spán heim ár hvert um lengri og skemmri tíma og á sama tíma fjölgar spænskum ferðamönnum á Íslandi sem er mikið ánægjuefni. Við myndum auðvitað fagna því sérstaklega ef Spánverjar ákveða að koma á fót sendiráði hérlendis," segir Þorgerður Katrín. "Við ræddum vitanlega Evrópumálin en Spánn hefur nú átt aðild að sambandinu í fjóra áratugi og Albares fer ekki leynt með þá skoðun að það skref hafi verið þjóð sinni til heilla. Þá erum við bandamenn í Atlantshafsbandalaginu og hefur samstarf okkar á sviði öryggismála verið að aukast jafnt og þétt þrátt fyrir fjarlægð milli ríkjanna. Spánverjar önnuðust til að mynda loftýmisgæslu bandalagsins á Íslandi í fyrsta skipti á síðasta ári. Síðast en ekki síst ríkir mikill samhljómur milli þjóðanna þegar kemur að mannréttindamálum, og þá sérstaklega á sviði kynjajafnréttismála þar sem bæði ríkin standa framarlega á alþjóðavísu."

Dagskrá utanríkisráðherra Spánar á Íslandi var þétt. Hann hóf daginn á því að heimsækja Alþingi í morgun og fundaði spænski ráðherrann með utanríkismálanefnd. Því næst lá leið hans í ráðherrabústaðinn við Tjarnargötu til fundar við utanríkisráðherra og síðar Kristrúnu Frostadóttur forsætisráðherra.

Þar á eftir var haldinn opinn viðburður með utanríkisráðherrum Íslands og Spánar í Norræna Húsinu í samstarfi við Alþjóðamálastofnun Háskóla Íslands. Að því loknu hélt Albares svo í heimsókn í þjóðgarðinn á Þingvöllum í fylgd Þorgerðar Katrínar.