М.Говьсайхан: Их хотынхоо өнгө төрхийг тодорхойлж, иргэдийн ая тухтай амьдрах орчныг бүрдүүлэхэд барилгын салбарын хамт олны хичээл зүтгэл, хувь нэмэр үнэлж баршгүй билээ

Монгол Улсад орчин цагийн барилгын салбар үүсэж, хөгжсөний түүхт 100 жилийн ойг тохиолдуулан Нийслэлийн Хөрөнгө оруулалтын газрын дарга М.Говьсайхан Улаанбаатар хотынхоо хөгжил дэвшил, бүтээн байгуулалтад үнэтэй хувь нэмэр оруулж, салбартаа тууштай, үр бүтээлтэй ажиллаж буй гүйцэтгэгч компаниудын төлөөллийг хүлээн авч уулзаж, барилгын салбарын 100 жилийн ойн медалийг гардууллаа.

Энэ үеэр газрын дарга М.Говьсайхан: Их хотынхоо өнгө төрхийг тодорхойлж, иргэдийн ая тухтай, эрүүл, аюулгүй орчинд ажиллаж, амьдрах нөхцөлийг бүрдүүлэхэд барилгын салбарын хамт олон, инженер, техникийн ажилтнуудын хөдөлмөр, хичээл зүтгэл үнэтэй хувь нэмэр оруулж буйг онцлоод хариуцсан ажилдаа мэргэжлийн ур чадвар гаргаж, чанартай гүйцэтгэлийг эрхэмлэн ажиллаж буй байгууллагуудад талархал илэрхийллээ.

Хотын өнөө ба ирээдүйг хамтдаа бүтээн байгуулж буй Та бүхэнд Барилгын салбарын түүхт 100 жилийн ойн баярын мэнд хүргэж, бүтээн байгуулалт бүхэн тань чанартай, ажил үйлс бүхэн тань амжилт бүтээлээр дүүрэн байхыг хүсэн ерөөе.