STQARRIJA MILL-UFFIĊĊJU TAD-DEPUTAT PRIM MINISTRU U L-MINISTERU GĦALL-AFFARIJIET BARRANIN U T-TURIŻMU Regolamenti ġodda għal-lukandi u proprjetajiet mikrija għal żmien qasir

L-awtoritajiet tat-turiżmu mhux se jibqgħu jikkunsidraw lukandi ġodda jew estensjonijiet ta' dawk eżistenti li jaqbżu l-limiti tal-għoli taż-żona

Id-Deputat Prim Ministru u Ministru għall-Affarijiet Barranin u t-Turiżmu, Ian Borg, ħabbar regolamenti ġodda li se jkomplu jtejbu l-kwalità tal-akkomodazzjonijiet turistiċi, fosthom lukandi, boutique hotels u proprjetajiet residenzjali li jinkrew għal żmien qasir.

Ir-Regolamenti tal-2026 dwar l-Alloġġ Turistiku, taħt l-Att dwar Servizzi tal-Ivvjaġġar u tat-Turiżmu għal Malta, se jieħdu post u jsaħħu erba' leġislazzjonijiet sussidjarji eżistenti dwar tipi differenti ta' akkomodazzjoni turistika.

"Ir-regolamenti l-ġodda se jagħlqu diversi lakuni li kien hemm fl-infurzar, u jsaħħu r-regolamenti eżistenti biex jikkontribwixxu għall-bidliet strateġiċi li qed jimmiraw għalihom il-Gżejjer Maltin, lejn offerta turistika aktar reżiljenti u ta' valur ogħla, filwaqt li jissalvagwardjaw il-ħarsien tal-komunitajiet lokali," qal Dr Borg.

"It-turiżmu huwa pilastru ewlieni tal-ekonomija. Sabiex niżguraw il-futur tiegħu jeħtieġ nieħdu deċiżjonijiet kuraġġużi u responsabbli, filwaqt li nagħtu direzzjoni ċara għall-investimenti futuri f'dan il-qasam. Dan huwa dak li qed nagħmlu b'dawn ir-regolamenti, li se jgħollu l-livell f'kull tip t'akkomodazzjoni, sabiex niżguraw li nibqgħu nilħqu l-aspettattivi ta' dawk li jżuruna," kompla jispjega.

Fost bidliet oħra, sidien jew operaturi ta' proprjetajiet ta' kirjiet għal żmien qasir issa se jkunu meħtieġa jwaħħlu tabella barra l-bieb tal-proprjetà, li tinkludi n-numru tal-liċenzja u l-isem u n-numru ta' kuntatt ta' persuna li tkun disponibbli 24 siegħa kuljum biex tirċievi l-ilmenti u ssolvi d-diffikultajiet relatati li jistgħu jinqalgħu. Fil-każ ta' proprjetajiet li jiffurmaw parti minn kondominju, hekk kif is-sidien jingħataw liċenzja mill-Awtorità Maltija għat-Turiżmu (MTA), ikunu wkoll obbligati jipprovdu din l-informazzjoni lill-amministraturi tal-blokka residenzjali konċernata.

Akkomodazzjonijiet mikrija għal żmien qasir se jkollhom ukoll jippreżentaw u jwettqu pjan adegwat ta' ġbir u mmaniġġjar tal-iskart, flimkien ma' rekwiżiti oħra relatati. Sidien li jinqabdu jikru akkomodazzjonijiet għal żmien qasir mingħajr liċenzja valida tal-Awtorità Maltija għat-Turiżmu (MTA) issa jistgħu jiġu skwalifikati milli japplikaw għal-liċenzja għal tliet snin, u dan minbarra penali oħrajn applikabbli.

Ir-regolamenti mħabbra nhar l-Erbgħa jintroduċu wkoll rekwiżiti aġġornati għal żviluppi ta' lukandi ġodda jew żvilupp mill-ġdid u estensjonijiet ta' lukandi eżistenti, kif ukoll għal stabbilimenti oħra ta' akkomodazzjoni kollettiva, inklużi guest houses u boutique hotels. Dan sabiex iħeġġu lill-investituri jiffukaw fuq servizz aħjar, aktar milli fuq il-volum.

L-MTA mhux se tibqa' tikkunsidra b'mod favorevoli applikazzjonijiet għal lukandi ġodda jew għal estensjonijiet u żvilupp mill-ġdid ta' lukandi eżistenti li jaqbżu l-għoli massimu permess fiż-żona, hekk kif stabbilit fil-Local Plan Height Limitation Maps jew fid-Development Briefs.

Lukandi ġodda, estensjonijiet jew żvilupp mill-ġdid ta' lukandi eżistenti b'aktar minn 200 kamra, kif ukoll lukandi b'klassifikazzjoni inqas minn tliet stilel, ukoll mhux se jiġu kkunsidrati. Bl-istess mod, guest houses se jiġu kkunsidrati biss sa massimu ta' 20 kamra jekk ikunu jinsabu f'Żoni ta' Konservazzjoni Urbana, f'bini skedat jew f'bini b'karatteristiċi arkitettoniċi partikolari, u jiġu aċċettati biss jekk l-iżvilupp propost ikun qed jiżgura l-ħarsien tal-wirt arkitettoniku tal-proprjetà.

Ir-regolamenti qed jenfasizzaw b'mod partikolari r-restawr sensittiv u l-użu mill-ġdid ta' bini ta' valur storiku għal akkomodazzjonijiet turistiċi ta' kwalità għolja, permezz tal-introduzzjoni tat-Tikketta tal-Patrimonju u t-tikketta Diffuso, li tippermetti li lukandi u guest houses joperaw minn għadd ta' binjiet differenti fl-istess Żona ta' Konservazzjoni Urbana qrib binja ċentrali li fiha jkun hemm il-faċilitajiet ewlenin. L-MTA se tippermetti li lukandi u guest houses ta' tlieta, erba' u ħames stilel jippromwovu lilhom infushom bħala "lukandi ta' patrimonju", dejjem jekk il-karatteristiċi storiċi tagħhom ikunu ġew imħarsa b'mod tajjeb.

Għall-ewwel darba, qed jidħlu wkoll fil-liġi Maltija t-tikketti ta' lukandi Boutiques u Boutiques Lussużi, u dan sabiex ikun xprunat aktar investiment f'dawn it-tip t'akkomodazzjonijiet tal-ogħla livell.

Ir-regolamenti l-ġodda tfasslu wara proċess sħiħ ta' konsultazzjoni ma' dawk kollha konċernati, inkluż perjodu ta' konsultazzjoni ta' xahar f'Novembru li għadda, li minnu nkisbu aktar minn 260 fehmiet u suġġerimenti. Saru wkoll diskussjonijiet ma' rappreżentanti tal-industrija, entitajiet governattivi, kunsilli lokali, u oħrajn involuti f'dan il-qasam. Il-konsultazzjoni kienet tinkludi wkoll żewġ webinars b'kollaborazzjoni mal-Kamra tan-Negozji Żgħar u Medji u l-Awtorità għall-Iżvilupp Reġjonali ta' Għawdex.