Inés Rey pon en valor o enxeño e creatividade do alumnado dos 17 centros educativos galegos que participaron na V Liga Maker Drone na Coruña

O Coliseum acolleu hoxe a entrega de premios aos centros educativos gañadores da Liga Maker Drone

O Coliseum da Coruña abriu hoxe as súas portas aos máis de 170 alumnos e alumnas participantes na V Liga Make Drone, unha iniciativa organizada pola Fundación Barrié e o ITG que congregou a 17 centros educativos de toda Galicia nunha xornada na que as rapazas e rapaces amosaron a súa capacidade para resolver o reto de deseñar, programar e voar un sistema dron orientado a efectuar tarefas de mantemento en altura.

O desafío coroou novamente ao CPR Plurilingüe Montecastelo (Vigo) como gañador do certame, reeditando así a súa vitoria do ano pasado. O premio foi entregado pola alcaldesa da Coruña, Inés Rey; Pilar Romero Vázquez-Gulías, presidenta da Fundación Barrié; e Carlos Calvo Orosa, director general do ITG.

A rexedora, acompañada no acto polo concelleiro de Educación, Formación e Innovación Tecnolóxica, Juan Ignacio Borrego, puxo en valor a implicación, enxeño e capacidade creativa das e dos alumnos que tomaron parte nesta edición da Liga Maker Drone, que tamén recoñeceu o labor doutros catro equipos participantes: o IES Francisco Daviña Rey (Monforte de Lemos), que recibiu o premio ao mellor deseño; o CPR Las Acacias (Vigo), que obtivo un recoñecemento por presentar a solución máis disruptiva; o IES Isaac Díaz Pardo de Sada (A Coruña) acadou o premio á destreza en voo; e o IES Poeta Díaz Castro, de Guitiriz (Lugo), que se levou o premio á mellor presentación.